دوای بەدواداچوونی ئاڤا کێشەی زمانی کوردی لە ناوچە کوردستانییەکان چارەسەر کرا

ئاڤا نیوز

 

دوای بەدواداچوونی بەرنامەی مۆری ئاڤا لەسەر کێشەی زمانی کوردی لە پرسیارەکانی زانکۆکانی هەرسێ پارێزگای کەرکووک، دیالە و نەینەوا بە تایبەت لە کۆلێژی یاسا لە زانکۆی کەرکووک، کێشەکە چارەسەر کرا.

 

چیرۆکی سەرەکی: بڕیارێکی وەزارەتی خوێندنی باڵای عێراق کە پێشتر ئاڕاستەی زانکۆ حکومی و تایبەتەکانی کەرکووک، موسڵ و دیالە کرابوو، سەرجەم زانکۆکان پابەند دەکات زمانی فەرمی لە پرسیاری تاقیکردنەوەکان عەرەبی و ئینگلیزییە و بەهەموو شێوەیەک زمانی کوردی لە وەڵامدانەوەی تاقیکردنەوەکان قەدەغە بکرێت، هەرچەندە ئەو بڕیارە ڕاگیرا، بەڵام هێشتا لە بەشێک لەو زانکۆیانە کاریگەری مابوو و ڕێگە بە وەرگێڕانی پرسیار و وەڵامەکان بۆ زمانی کوردی نەدەدرا.

 

لێدوانی فەرمی: فەهمی بورهان، سەرۆکی دەستەی ناوچە کوردستانییەکانی دەرەوەی ئیدارەی هەرێمی کوردستان بەئاڤای گوت، کێشەی پرسیارەکانی زمانی کوردی بە فەرمانێکی کارگێڕی چارەسەر کراوە.

 

زانیاریی زیاتر: بە گوتەی سەرۆکی دەستەی ناوچە کوردستانییەکان، بە فەرمانی ژمارە 7-18 لە بەرواری 3-9-2025، بڕیار دراوە لیژنەیەکی نۆ کەسی پێکبهێنرێت بۆ وەرگێڕانی پرسیارەکان بۆ سەر زمانی کوردی ئەم فەرمانەش لەگەڵ دەرچوونی کار پێدەکرێت.