ئیسرائیل: شەڕ کۆتایی نایەت تاوەکو هەموو بارمتەکان ئازاد نەکرێن

ئاڤا نیوز

وەزیری دەرەوەی ئیسرائیل وەڵامی بزووتنەوەی حەماس دەداتەوە و لە پێناو کۆتاییهێنان بە شەڕ مەرجەکانی وڵاتەکەی ڕادەگەیەنێت. یەکێک لە مەرجەکان ئەوەیە کە دەبێت حەماس هەموو بارمتەکان ئازاد بکات.

وێنە گەورەکە: دوای دەستپێشخەری ستیڤ ویتکۆڤ، نێردەی تایبەتی سەرۆکی ئەمریکا بۆ ڕاگەیاندنی ئاگربەست و ئازادکردنی بارمتەکان و ڕێگەدانی ئیسرائیل بە چوونەژوورەوەی هاوکارییە مرۆییەکان بۆ نێو کەرتی غەززە، حەماس لە بەیاننامەیەکدا ڕەزامەندی دەربڕی و ڕایگەیاند، هەموو بارمتەکان ئازاد دەکات لە بەرامبەر ئاگربەستی هەمیشەیی و ڕێگەدان بە چوونەژوورەوەی هاوکارییە مرۆییەکان.

لێدوانی فەرمی: جەدعون ساعر، وەزیری دەرەوەی ئیسرائیل ئەمڕۆ یەکشەممە لە کۆنگرەیەکی ڕۆژنامەوانیدا ڕایگەیاند: شەڕ کۆتایی نایەت تاوەکو حەماس هەموو بارمتەکان ئازاد نەکات و دەستبەرداری چەک نەبێت، جگە لە ئازادکردنی بارمتەکان، دەستبەرداربوونی حەماس لە چەک مەرجێکی سەرەکی ئیسرائیلە بۆ ڕاگرتنی شەڕ بۆ ئەوەی هەموو جووڵەیەکی چەکداری لە شارەکە کۆتایی پێبهێنرێت و گەرەنتی ئەوە بکرێت جارێکی دیکە ئیسرائیل پارێزراو دەبێت.

ئەوەی پێوسیتە بیزانیت: لە 7-10-2023 چەکدارانی حەماس هێرشییان کردە سەر کۆمەڵگەیەکی جوولەکەنشین لە نزیک کەرتی غەززە، بەهۆیەوە نزیکەی هەزار ئیسرائیلی کوژران و زیاتر لە 300 کەسی دیکە بەدیل گیران. لەبەرامبەردا ئیسرائیل هێرشی زەمینی و ئاسمانی بۆ سەر کەرتی غەززە دەستپێکرد.