سەرۆکوەزیرانی عێراق بە سەردانێکی ڕانەگەیێنراو سەردانی وڵاتێکی ئەوروپا دەکات

ئاڤا نیوز

بڕیارە سبەی دووشەممە، سەرۆکوەزیرانی عێراق بە سەردانێکی ڕانەگەیێنراو سەردانی وڵاتێکی ئەوروپا بکات.

زانیاریی تایبەت: بەگوێرەی سەرچاوەیەکی تایبەت لە حکومەتی عێراق بۆ ئاڤا میدیا، بڕیارە سبەی دووشەممە 2025-9-8، محەممەد شیاع سوودانی، سەرۆکوەزیرانی عێراق بە سەردانێکی ڕانەگەیێنراو سەردانی بەلجیکا بکات.

ئەوەی پێویستە بیزانیت: لە 2025-6-5، محەممەد شیاع سوودانی، سەرۆکوەزیرانی عێراق لە بەغدا پێشوازیی لە سێرج دیکشن، باڵیۆزی بەلجیکا لە عێراق کرد و لە دیدارەکەدا پێداچوونەوە بە پەیوەندییەکانی عێراق و بەلجیکا، گرنگترین دۆسیەکانیان و ڕێڕەوی گەشەکردنیان و پەیوەندییەکان لەگەڵ سەرجەم وڵاتانی یەکێتیی ئەوروپا کرا.

زانیاریی زیاتر: سوودانی جەختیشیکردەوە لە پێشوازیکردن لە بەشداریکردنی کۆمپانیا بەلجیکییەکان لە کەرتە خزمەتگوزارییە جۆراوجۆرەکان و دروستکردنی ژێرخانی ئابووری لە کەرتەکانی وزە، تەندروستی و ئاو، بە لەبەرچاوگرتنی بوونی ژینگەیەکی وەبەرهێنانی ئارام و هاندەر بۆ وەبەرهێنەران.

لەهەمان کاتدا: سەرۆکوەزیرانی عێراق ستایشی بەشداری بەلجیکای کرد لە پشتگیریکردنی سەقامگیری عێراق و سەروەری و بەرژەوەندییە باڵاکان لەچوارچێوەی هاوپەیمانی نێودەوڵەتی، داوای پەرەپێدانی هاوکاری کرد بۆ گواستنەوە بۆ قۆناغی بەشداریکردن لە ئاوەدانکردنەوە و بووژانەوەی ئابووری، جگە لە هەماهەنگی هاوبەش بۆ پشتگیریکردنی سەقامگیری ناوچەکە و کەمکردنەوەی ململانێ هەرێمییەکان.

لەبەرامبەردا: باڵیۆز دیکشن، سڵاوی سەرۆکی حکومەتی بەلجیکای بە سوودانی گەیاند و جەختیشیکردەوە لە کارکردن بۆ واژۆکردنی یاداشتی لێکتێگەیشتنی هاوبەش لە بوارە جۆراوجۆرەکاندا.