ترەمپ دوایین هۆشداری بە حەماس دەدات

ئاڤا نیوز

شاندێکی ئەمریکا پێشنیازی ئاگربەستیان داوەتە بزووتنەوەی حەماس و ترەمپیش دەڵێت، ئەمە دوایین هۆشدارییە بۆ حەماس.

وێنە گەورەکە: شاندێکی کۆشکی سپی بە سەرۆکایەتیی ستیڤ ویتکۆف، نوێنەری ئەمریکا بۆ ڕۆژهەڵاتی ناوەڕاست پێشنیازێکی نوێیان بۆ ئاگربەست و ئاڵوگۆڕی بارمتەکان لە غەززە پێشکەش بە حەماس کردووە، ئەم هەوڵە دیپلۆماسییە لە کاتێکدایە کە ئیسرائیل پلانی هێرشێکی بەرفراوانی بۆ داگیرکردنی شاری غەززە هەیە.

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، هەمووان دەیانەوێت بارمتەکان بگەڕێنەوە ماڵەوە. هەمووان دەیانەوێت ئەم جەنگە کۆتایی بێت، "ئیسرائیلییەکان مەرجەکانی منیان قبووڵ کردووە". ئێستا کاتی ئەوەیە حەماسیش قبوڵی بکات. "من هۆشداریم داوەتە حەماس سەبارەت بە لێکەوتە نەرێنییەکانی قبووڵنەکردنی مەرجەکانم، ئەمە دوا هۆشداری منە".

زانیاریی زیاتر: پێگەی ئەکسیۆسی ئەمریکا بڵاویکردووەتەوە، پێشنیازەکەی ئەمریکا بریتییە لە ئازادکردنی ئەو 48 بارمتەیەی ئیسرائیل کە لەلای حەماس ماوەتەوە، لە بەرامبەر ئاگربەستێکی هەمیشەیی و کۆتاییهێنان بە ئۆپەراسیۆنەکانی ئیسرائیل لە غەززە. هەروەها ئیسرائیل دوو هەزار و 500 بۆ سێ هەزار زیندانی فەلەستینی ئازاد دەکات.

لەلایەکی دیکەوە: ترەمپ، ویتکۆفی ڕاسپاردووە کە هەوڵەکانی بۆ گەیشتن بە ڕێککەوتن چڕ بکاتەوە. ویتکۆف لەڕێگەی بازرگانی فەلەستینی-ئەمریکی و چالاکوانێکی ئیسرائیلی پەیامەکەی گەیاندووەتە حەماس.