ترەمپ: لە ئاگربەستی غەززە نزیکین

ئاڤا نیوز

هەوڵەکان بۆ ڕاگرتنی شەڕی غەززە بەردەوامن و سەرۆکی ئەمریکا دووپاتیدەکاتەوە دواین هۆشداریی بە بزووتنەوەی حەماس دراوە و ئاشكرای دەکات، بەم نزیکانە دەتوانن لە کەرتی غەززە بگەنە ڕێککەوتن. 

وێنە گەورەکە: شەڕی غەززە لە دووەم ساڵی نزیکدەبێتەوە، سەرەڕای هەوڵە نێودەوڵەتییەکان بۆ ڕاگرتنی شەڕ و ڕاگەیاندنی ئاگربەستێکی گشتگیر لە کەرتی غەززە، بەڵام ئیسرائیل بەردەوامە لە هێرشەکانی و ژمارەی کوژراو و برینداران بەرزتر دەبێتەوە.

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، پێموایە بەم نزیکانە دەتوانین لەسەر کەرتی غەززە بگەینە ڕێککەوتنێک، ئێمە کار لەسەر چارەسەرێک دەکەین کە زۆر باش بێت و هەوڵدەدەین کۆتایی بە دۆخەکە بهێنین و بارمتەکان بگەڕێنینەوە.

زانیاریی زیاتر: ترەمپ ئاشکرای کردووە، ئیسرائیلییەکان مەرجەکانی ئەویان قبوڵ کردووە و  ئێستا کاتی ئەوەیە حەماسیش قبوڵی بکات و هۆشدارییش داوەتە حەماس و دەڵێت ئەمە دواین هۆشداری منە بۆ ئەوان.

لەلایەکی دیکەوە: دوای ئەم هۆشدارییەی ترەمپ، بزووتنەوەی حەماس لە بەیاننامەیەکدا ئاشكرای کرد کە ئامادەن دانوستان ئەنجام بدەن، بەمەرجی وەستانی تەواوەتی شەڕ و کشانەوەی سوپای ئیسرائیل لە کەرتەکە.