وەزیری دەرەوەی ئەمریکا سەردانی ئیسرائیل دەکات

ئاڤا نیوز

وەزارەتی دەرەوەی ئەمریکا ئاشكرای کرد، مارکۆ ڕۆبیۆ، وەزیری دەرەوەی ئەمریکا سەردانی ئیسرائیل دەکات، جەخت لە ئامانجە هاوبەشەکانی ئەمریکا و ئیسرائیل دەکاتەوە.

وێنە گەورەکە: شەڕی غەززە بەردەوامە و لە دووەم ساڵی نزیک دەبێتەوە و  ئیسرائیل ئۆپەراسیۆنەکانی لە کەرتی غەززە چرتڕ کردووەتەوە و دانوستانەکانی حەماس و ئیسرائیل هیچ دەرئەنجامێکیان بەدەست نەهێناوە و تەنانەت ئاڵۆزیی تێکەوت دوای هێرشەکەی ئیسرائیل بۆ سەر سەرکردەکانی حەماس لە قەتەر لە هەفتەی ڕابردوو.

زانیاریی بەدەستهاتوو: وەزارەتی دەرەوەی ئەمریکا لە ڕاگەیێنراوێكدا ئاشكرای كرد، ''مارکۆ ڕوبیۆ وەزیری دەرەوەی وڵاتەکە لەم هەفتەیەدا گەشت بۆ ئیسرائیل و بەریتانیا دەکات لە نێوان ڕۆژانی 13 بۆ 18ـی ئەم مانگە''.

زانیاریی زیاتر: لە درێژەی بەیاننامەکەدا هاتووە، '' ڕۆبیۆ ڕۆژی شەممە 13ـی ئەیلوول بەرەو ئیسرائیل دەچێت و پرسە فراوانەکانی پەیوەست بە ئاسایشی ڕۆژهەڵاتی ناوەڕاست ململانێی نێوان ئیسرائیل و حەماس و پرسە تاوتوێی دەکات، جەخت لە ئامانجە هاوبەشەکانی ئەمریکا و ئیسرائیل دەکاتەوە، لەوانە ڕێگریکردن لە حوکمی حەماس لە غەززە''.

بۆچی گرنگە: ئەم سەردانە لە کاتێکدایە کە ئیسرائیل لە بۆردومانکردنی کەرتی غەززە بەردەوامە و ئۆپەراسیۆنەکانی چرتڕ کردووەتەوە، هاوکات ڕۆژی 9 ـی ئەم مانگە، ئیسرائیل کۆبوونەوەیەکی سەرکردەکانی حەماسی لە شارى دەوحەی پایتەختی قەتەر بۆردومان کرد و ئەمەش کاردانەوەی وڵاتانی بەدوای خۆیدا هێنا و گرژییەکانی زیاتر کرد.

ئەمەش بزانە: 16ـی ئەیلوولی 2025 بڕیارە دۆناڵد ترەمپ، سەرۆکی ئەمریکا سەردانی بەریتانیا بکات ڕۆبیۆش لەگەڵی بچێت و سەردانەکەیان لە 18ی ئەیلوول کۆتایی دێت.