ئەحمەد شەرع چەند نهێنییەک لەبارەی گفتوگۆکانی سووریا لەگەڵ ئیسرائیل ئاشکرا دەکات

ئاڤا نیوز

 

ئەحمەد شەرع دەڵێت، سووریا لەگەڵ ئیسرائیل لە گفتوگۆدایە بۆ گەیشتن بە ڕێککەوتنێک کە بەپێی ئەو ڕێککەوتنە هێزەکانی ئیسرائیل لەو ناوچانە بکشێنەوە کە دوای ڕووخانی بەشار ئەسەد لە کانوونی یەکەمی 2024 داگیریان کردوون.

 

وێنە گەورەکە: دوای ڕووخانی ئەسەد لە 8ـی کانوونی یەکەمی 2024 لەلایەن هاوپەیمانێتییەکی چەکداریی ئیسلامییەوە، کە زیاتر لە 13 ساڵ شەڕی ناوخۆیی بەدوای خۆیدا هێنا، هێزەکانی ئیسرائیل چوونە ناوچەی بێچەکی جۆلان کە بەپێی ڕێککەوتنی جیاکردنەوەی هێزەکان لە ساڵی 1974 دامەزرابوو.

 
لێدوانی فەرمی: ئەحمەد شەرع، سەرۆکی سووریا لە چاوپێکەوتنێکیدا لەگەڵ کەناڵی "ئیخبارییەی سووری" ڕایگەیاند: "ئێمە ئێستا لە قۆناغی گفتوگۆ و تاوتوێکردنداین". وتیشی، ئیسرائیل دوای ڕووخانی ڕژێم پێیوایە سووریا لەو ڕێککەوتنە دەرچووە، ئاماژەی بە ڕێککەوتنی جیاکردنەوەی هێزەکان دا، سەرەڕای ئەوەی سووریا لە یەکەم ساتەوە پابەندبوونی خۆی نیشانداوە. "ئێستا گفتوگۆ لەسەر ڕێککەوتنێکی ئەمنی دەکرێت بۆ ئەوەی ئیسرائیل بگەڕێتەوە سەر دۆخی پێش 8ـی کانوونی یەکەم."

 

ئەوەی پێویستە بیزانیت: ئیسرائیل و سووریا پەیوەندیی دیپلۆماسییان نییە و لە ساڵی 1948ـەوە بە فەرمی لە حاڵەتی جەنگدان. مانگی ڕابردوو، میدیای فەرمیی سووریا ڕایگەیاند، ئەسعەد شەیبانی، وەزیری دەرەوەی سووریا، لە پاریس لەگەڵ ڕۆن دێرمەر، وەزیری کاروباری ستراتیژیی ئیسرائیل کۆبووەتەوە بۆ گفتوگۆکردن لەسەر کۆنترۆڵکردنی گرژییەکان و دۆخی سوەیدا دوای توندوتیژییە خوێناوییەکان. هەروەها، بنیامین ناتانیاهۆ، سەرۆکوەزیرانی ئیسرائیل، دانینا بەوەی وڵاتەکەی لە "گفتوگۆکاندا" بەشدارە بۆ دامەزراندنی ناوچەیەکی بێ چەک لە باشووری سووریا.

 

لەلایەکی دیکەوە: لە چاوپێکەوتنەکەدا، شەرع ئاشکرای کرد کە هێزەکانی سووریا لە کاتی هێرشەکەی ڕووخاندنی بەشار ئەسەددا، لە گفتوگۆیەکی نهێنیدا لەگەڵ ڕووسیا بوون. ئەو گوتی: "کاتێک گەیشتینە حەما لە شەڕی ئازادکردندا، گفتوگۆ لە نێوان ئێمە و ڕووسیادا کرا." وتیشی: "کاتێک گەیشتینە حومس، ڕووسەکان لەو کاتەدا لە شەڕەکە دوورکەوتنەوە، لە چوارچێوەی ڕێککەوتنێکدا کە لە نێوان ئێمە و ئەواندا کرا،" ئاماژەی بەوەدا کە هێزەکانیان خۆیان لە هێرشکردنە سەر بنکەی ئاسمانیی ڕووسی حمێمیم پاراستووە.