پەرلەمانی عێراق دانیشتنەکانی دەستپێدەکاتەوە

ئاڤا نیوز

ڕۆژی دووشەممەی داهاتوو پەرلەمانی عێراق دانیشتنەکانی دەستپێدەکاتەوە و 11 بڕگە لە کارنامەی کۆبوونەوەکەیدا هەن، لەوانەش دەنگدان لەسەر حەوت پڕۆژەیاسا.

وێنە گەورەکە: کەمتر لە دوو مانگ ماوە بۆ هەڵبژاردنی خولی نوێی پەرلەمانی عێراق، بۆیە ئەم خولەی پەرلەمان دانیشتنەکان بە سستی بەڕێوەدەبات و کۆتا دانیشتنی 27ـی ئاب بوو، واتە لە 17 ڕۆژی ڕابردوودا دەبوو لانیکەم چوار کۆبوونەوە بکات، بەڵام هیچ کۆبوونەوەیەکی نەکردووە.

ڕاگەیێنراوی فەرمی: سەرۆکایەتی پەلەمانی عێراق بڵاویکردەوە، ڕۆژی دووشەممە 15ـی ئەیلوول، کۆبوونەوەی ئاسایی پەرلەمان دەکرێت، تێیدا دەنگ لەسەر هەمواری سێیەمی یاسای قەرەبووکردنەوەی ئەوانەی بەهۆی بەعسەوە بەشێکی جەستەیان لەدەستداوە، ڕێکخستنی وزەی نوێبووەوە، تەندروستی دەروونی، ڕێککەوتنی هاندانی وەبەرهێنان لەنێوان عێراق و سعوودیە، هەمواری چوارەمی یاسای وەبەرهێنانی پیشەسازیی لەنێوان هەردوو کەرتی تایبەت و تێکەڵ، هەمواری یەکەمی یاسای بەرگری شارستانی دەدرێت.

زانیاریی زیاتر: لە کۆبوونەوەکەدا خوێندنەوەی یەکەم بۆ هەردوو پڕۆژەیاسای هەمواری سێیەمی یاسای خزمەتی زانکۆیی و هەمواری دووەمی یاسای قەرزی کشتووکاڵیش دەکرێت، خوێندنەوەی دووەمیش بۆ هەمواری یاسای دەستەی گشتی بۆ چاودێری تەرخانکردنی داهاتە فیدراڵییەکان و یاسای کۆلێژی فڕۆکەوانی ئاسمانی دەکرێت.