سوودانی داوای پێکهێنانی هاوپەیمانێتییەکی سەربازیی ئیسلامی دەکات

ئاڤا نیوز

محەممەد شیاع سوودانی، سەرۆکوەزیرانی عێراق دەڵێت، هێرشەکەی ئیسرائیل بۆ سەر قەتەر پێشێلکردنی هەموو یاسا و عورفە نێودەوڵەتییەکان بوو. هاوکات داوا لە وڵاتانی ئیسلامی دەکات هاوپەیمانێتییەکی سیاسی، ئابووری و بەرگریی سەربازیی هاوبەش دروست بکەن.

 

وێنە گەورەکە: کاردانەوەی هێرشەکەی ئیسرائیل بۆ سەر دەوحە لە قەتەر بەردەوامە و وڵاتانی ئیسلامی لەنێوانیاندا عێراق پشتیوانی خۆیان بۆ وڵاتی قەتەر پیشاندا.

 

لێدوانی فەرمی: محەممەد شیاع سوودانی بە کەناڵی "جەزیرە"ی قەتەریی ڕایگەیاند: "هیچ شتێک نییە ڕێگری بکات لە پێکهێنانی هاوپەیمانیی وڵاتانی ئیسلامی لە شێوەی هێزێکی ئەمنی هاوبەش بۆ بەرگری لە خۆیان. وڵاتانی ئیسلامی و عەرەبی کارتی زۆریان هەیە کە دەتوانرێت بۆ ڕووبەڕووبوونەوەی دەستدرێژیی ئیسرائیل بەکاربهێنرێت". وتیشی، ئیسرائیل تەنیا بە هێرشکردنە سەر قەتەر ناوەستێت.

 

بە گوتەی سەرۆکوەزیرانی عێراق، "حکومەتی ئیسرائیل هەموو شتێکی بە کەم سەیر کردووە و ئەوەی زیاتر لە دوو ساڵە لە غەززە ڕوودەدات کوشتنی بە بەرنامەیە". 

 

هەنگاوی داهاتوو؛ بڕیارە ڕۆژانی یەکشەممە و دووشەممە، لووتکەی ئیسلامی- عەرەبی سەبارەت بە هێرشەکەی ئیسرائیل بکرێت، سوودانی، ڕەجەب تەیب ئەردۆغان، سەرۆککۆماری تورکیا و مەسعوود پزیشکیان، سەرۆککۆماری ئێران و ئەحمەد شەرع، سەرۆککۆماری سووریا و عەبدولفەتاح سیسی، سەرۆککۆماری میسر و محەممەد شەریف، سەرۆکوەزیرانی پاکستان و چەندین سەرۆک و سەرکردەی دیکە بەشدار دەبن.

 

باکگراوند: سێشەممەی ڕابردوو، ئیسرائیل هێرشی کردە سەر بارەگای شاندی دانوستانکاری بزووتنەوەی حەماس لە دەوحە، سەرەڕای ڕزگاربوونی سەرکردەکانی حەماس، بەڵام شەش کەس لەو هێرشەدا گیانیان لەدەست دا.