لە ئەمساڵدا هەسەدە و هاوپەیمانان 54 ئۆپەراسیۆنیان لە دژی داعش ئەنجامداوە

ئاڤا نیوز

لە سەرەتای ئەمساڵەوە هاوپەیمانی نێودەوڵەتی بەهاوکاری هێزەکانی سووریای دیموکرات (هەسەدە) 54 ئۆپەراسیۆنیان دژی داعش لە ناوچەکانی ڕۆژئاوای کوردستان و باکوور و ڕۆژهەڵاتی سووریا ئەنجامداوە، لە ئەنجامیشدا 14 سەرکردە و ئەندامی داعش کوژراون.

وێنە گەورەکە: لەگەڵ ڕووخانی دەسەڵات لە سووریا، داعش جموجۆڵەکانی لەو وڵاتەدا زیاتر کرد، ئەوەش وایکرد هاوپەیمانی نێودەوڵەتی ئۆپەراسیۆنەکانی لەگەڵ هەسەدە زیاتر بکات تا ڕێگری لە گەڕانەوەی ڕێکخراوەکە و کۆنتڕۆڵکردنی خاکی نوێ لە سووریا بکات، هاوپەیمانان لەم بوارەدا هەماهەنگییان لەگەڵ دیمەشقیش پەرە پێداوە.

ڕاگەیێنراوی فەرمی: ڕوانگەی سووری بۆ مافەکانی مرۆڤ بڵاویکردەوە، لە نۆ مانگی ئەمساڵدا هاوپەیمانی نێودەوڵەتی بەهاوکاری هەسەدە لە پارێزگاکانی ڕەققە، حەسەکە، دێرەزوور و حەلەب 54 ئۆپەراسیۆنیان دژی داعش ئەنجامداوە، ئۆپەراسیۆنەکانیش لە چوارچێوەی زیاتر لە قاڵبدانی ڕێکخراوەکە و جووڵەکانی بووە کە بۆ سەر ئاسایش و ئارامی ناوچەکە مایەی هەڕەشە بوون.

زانیاریی زیاتر: ڕاگەیێنراوەکە ئاماژەی بەوەشكردووە، لە ئۆپەراسیۆنەکاندا 14 ئەندامی داعش کوژراون و 119ـی دیکەش دەستگیرکراون کە لەناویاندا سەرکردەی باڵا و دیار هەبوون، جگە لەوەش دەستبەسەر چەک و کەرەستەی تەقەمەنیشدا گیراوە کە ڕێکخراوەکە ویستبووی لە بە ئامانجگرتنی خەڵکی سڤیل و هێزە ئەمنییەکاندا بەکاریانبهێنێت.