لە واشنتنەوە؛ کۆبوونەوەیەکی چاوەڕوانکراو لە نێوان ترەمپ و شەرع

ئاڤا نیوز

لە پەراوێزی کۆبوونەوەکانی کۆمەڵەی گشتیی نەتەوەیەکگرتووەکان لە نیویۆرک، ئامادەکاری بۆ سازدانی دیدارێک لە نێوان دۆناڵد ترەمپ، سەرۆکی ئەمریکا و ئەحمەد شەرع، سەرۆکی سووریا دەکرێت.

 

چیرۆکی سەرەکی: بڕیارە لەنێوان 22 بۆ 30 ئەیلوول لە بارەگای نەتەوەیەکگرتووەکان لە نیویۆرک کۆبوونەوەکانی 80یەمین خولی کۆمەڵەی گشتیی نەتەوەیەکگرتووەکان بەڕێوەبچێت، بەشداریی ئەحمەد شەرع لەگەڵ سەرکردە و سەرۆکوەزیرانی زۆربەی وڵاتانی جیهان لەو کۆبوونەوەیە گرنگییەکی نێودەوڵەتی زۆری پێدەدرێت.

 

بڵاوکراوەی فەرمی: بەگوێرەی هەواڵێکی تۆڕی هەواڵی (CBS news)ی ئەمریکی، ئامادەکاریی بۆ سازدانی دیدارێک لە نێوان دۆناڵد ترەمپ، سەرۆکی ئەمریکا و ئەحمەد شەرع، سەرۆکی سووریا دەکرێت، لە پەراوێزی کۆبوونەوەکانی کۆمەڵەی گشتیی نەتەوەیەکگرتووەکان لە چەند ڕۆژی داهاتوودا.

 

ئەوەی پێویستە بیزانیت: شەرع یەکەم سەرۆکی سووریا دەبێت بەشداریی کۆبوونەوەکانی نەتەوەیەکگرتووەکان دەکات و وتارێک پێشکەش دەکات لە دوای ساڵی 1967، کاتێک نوورەدین ئەتاسی سەرۆکی وڵات بوو، چونکە پێشتر نە بەشار ئەسەد، سەرۆکی پێشووی ڕژێم و نە باوکی بەشداریی ئەم کۆبوونەوانەیان نەکردووە.

 

ئەمەش بزانە: لە دوای ڕووخانی ڕژێمی ئەسەد لە کانوونی یەکەمی 2024، دەسەڵاتی کاتی لە سووریا پشتگیریی ناوچەیی و نێودەوڵەتی بەدەستهێناوە. شەرع لە 14ی ئایاری ڕابردوو لە سعودیە لەگەڵ دۆناڵد ترەمپ، سەرۆکی ئەمریکا کۆبووەوە، دوای چەند ڕۆژێکیش لە سەردانیکردنی بۆ پاریس، کە لەوێ لەلایەن ئیمانوێل ماکرۆن، سەرۆکی فەرەنسا پێشوازی لێکرا.