لە سلێمانی و كەركووك سێ داعش دەستگیر دەكرێن

ئاڤا نیوز

بەڕێوەبەرایەتی گشتی ئاسایش - سلێمانی ڕایگەیاند، پشتبەستوو بە زانیاری هەواڵگری لە سلێمانی و كەركووك سێ چەکداری پێشووی داعشیان دەستگیر کردووە، کە بەمدواییە کاری ڕێکخراوەییان لە شانە نووستووەکانی داعش کردووە و هزری توندڕەوییان لە تۆڕە كۆمەڵایەتییەكان بڵاوكردووەتەوە.

چیرۆكی سەرەكی: بەڕێوەبەرایەتیی گشتیی ئۆپەراسیۆنەكانی دەزگای ئاسایشی هەرێمی كوردستان، بەهەماهەنگی لەگەڵ دەزگای هەواڵگری و دژەتیرۆری كەركووك، بە بڕیاری دادوەری لێكۆڵینەوەی ئاسایش، توانییان لە سنووری كەركووك چەکدارێکی پێشووی داعش دەستگیر بكەن، دوای ئەنجامدانی لێكۆڵینەوە و دانپێدانانی دەستگیركراوەكەی كەركووك و لەسەر بنەمای زانیاریی هەواڵگریی ورد، توانرا شوێنی دوو کەسی دیكەش لە سنووری پارێزگای سلێمانی دەستنیشان بكرێت و دەستگیربکرێن.

ڕاگەیێنراوی فەرمی: بەگوێرەی ڕاگەیێنراوی دەزگای ئاسایشی هەرێمی كوردستان، "ئەو سێ تیرۆرستەی دەستگیركراون، لە ماوەكانی ڕابردوودا، چەكداری داعش بوون و ئێستاش سەرقاڵی كاری ڕێكخراوەیی بوونە بۆ شانە نووستووەكانی داعش و لە تۆڕە كۆمەڵایەتییەكانیش بیری توندڕەوییان بڵاوكردووەتەوە".

پەیوەست بەم بابەتە: دوای كۆكردنەوەی زانیاریی پێویست لە ئەنجامی دانپێدانانی تیرۆرستە دەستگیركراوەكان، لە ڕۆژی 21ـی ئەیلوولی 2025، بەڕێوەبەرایەتیی گشتیی ئۆپەراسیۆنەكانی ئاسایش و هێزەكانی كۆماندۆی كوردستان و هاوپەیمانانی هێزی تایبەتی ئەمریكا، كێوماڵی ناوچەی شوانیان لە پارێزگای كەركووك كردووە و توانراوە چەندین مۆڵگە و حەشارگەی پاشماوەكانی شانە نووستووەكانی داعش لەو ناوچانە لەناو ببەن و تیرۆرستە دەستگیركراوەكان بەپێی ماددەی (2) لە یاسای بەرەنگاربوونەوەی تیرۆر ڕاگیراون و لێكۆڵینەوە لە دۆسیەكانیان دەكرێت" ئەمەش بەپێی ڕاگەیێنراوەکەی دەزگای ئاسایشی هەرێمی کوردستان.