گەردەلوولێک ژیان لە 10 شاری چین پەک دەخات

ئاڤا نیوز

 

بەهۆی هەڵکردنی گەردەلوولێکەوە، چین فەرمانی بە بەرپرسانی خۆجێی 10 شاری وڵاتەکەی کردووە قوتابخانە، کارگە و بازاڕەکانیان دابخەن.

 

هۆکارە زانراوەکان: گەردەلوولی (راگاسا) مەترسی لەسەر چەندین ناوچەی چین دروستکردووە و حکومەتی چینیش ڕێوشوێنی توندی ڕایگەیاندووە، ئەمەش دەیان ملیۆن کەس دەگرێتەوە و کاریگەری لەسەر ھەزاران کارگە لە ناوچە پیشەسازییەکانی چین دەبێت.

 

زانیاریی زیاتر: خێرایی گەردەلوولەکە گەیشتووەتە 230 کیلۆمەتر لە کاتژمێرێکدا و پێشبینی دەکرێت لە ماوەی 24 کاتژمێری داھاتوودا بگاتە ناوچە کەناراوییەکانی ناوەڕاست و ڕۆژئاوای ناوچەی گوانگدۆنگ کە ناوچەیەکی بازرگانیی گرنگە بۆ چین. تەنیا لە شاری شینزین کە ناوەندێکی تەکنەلۆژیایی چینە، داوا لە 400 هەزار دانیشتووی شارەکە کراوە ماڵەکانیان چۆڵ بکەن.

 

پێشتر چی ڕوو دا؛ گەردەلوولی ڕاگاسا پێشتر کاریگەری لەسەر فلیپین ھەبووە و لەوێ کەسێک گیانی لەدەست داوە.