تووشبوویەکی نوێی تای خوێنبەربوون لە هەولێر تۆمار کرا

ئاڤا نیوز

 

ئەمڕۆ سێشەممە، توشبوویەکی دیکەی تای خوێنبەربوون لە سنووری هەولێر تۆمار کرا، بەڕێوەبەرایەتیی تەندروستیی هەولێریش دەڵێت، "توشبووەکە لەژێر چاودێریی چڕدایە'.

 

زانیاریی تایبەت: سەرچاوەیەکی باڵا لە بەڕێوەبەرایەتیی تەندروستیی هەولێر بە ئاڤا میدیای ڕاگەیاند: ئەمڕۆ 23-9-2025، نەخۆشێک بۆ وەرگرتنی چارەسەر چووەتە نەخۆشخانەی ئەربیل ئینتەرناشناڵ، بەڵام دەرکەوتووە کە هەڵگری تای خوێنبەربوونە.

 

بەوتەی ئەو سەرچاوە باڵایە، نەخۆشەکە ژنە و تەمەنی 45 ساڵە و ئیشی بەخێوکردنی ئاژەڵ و کڕین و فرۆشتنی شیر و ماستیان کردووە.

 

زانیاریی زیاتر: سەرەڕای ئەوەی لە هەرێمی کوردستان پشتڕاستکراوەتەوە کە ئەو ژنە تووشبووە بە نەخۆشی تای خوێنبەربوون، هاوکات بۆ دڵنیابوونەوەی زیاتر پشکنینەکانی بۆ بەغدا نێردراوە.

 

ئەوەی پێویستە بیزانیت: تووشبووەکە ئێستا لە نەخۆشخانەی فریاکەوتنی ناوەند لە هەولێر لەژێر چاودێریدایە و دۆخی تەندروستی جێگیرە.

 

باکگراوند: تای خوێنبەربوون نەخۆشییەکی ڤایرۆسییە و لە ئاژەڵەوە بۆ مرۆڤ دەگوازرێتەوە، نیشانەکانی نەخۆشییەکە بریتین لە بەرزبوونەوەی پلەی گەرمیی جەستە، سەرئێشە و خوێنبەربوونی ژێر پێست، بە نەخۆشییەكی كوشندە هەژماردەكرێت و تا ئێستا چەندین کەسیش بەو نەخۆشییە گیانیان لەدەستداوە.