پەیامێک لە مەسرور بارزانییەوە: بەربەستێکی گەورەی بەردەم مووچە هەڵگیرا

ئاڤا نیوز

سەرۆکوەزیرانی کوردستان ڕایدەگەیێنێت، ڕێککەوتنی ئەمڕۆ [بۆ هەناردەکردنەوەی نەوتی کوردستان] دەستکەوتی ماندووبوون و هەوڵی زۆری تیمەکانی هەردوولا بوو. لەم ڕۆژە مێژوییەدا بە هەناردەکردنەوەی نەوت بەربەستێکی گەورەیان لە بەردەم دابینکردنی شایستە داراییەکانی خەڵکی کوردستان هەڵگرت.

 

چیرۆکی سەرەکی: ئەمڕۆ پێنجشەممە بەفەرمی ڕێککەوتنی سێقۆڵی لەنێوان وەزارەتی سامانە سرووشتییەکانی کوردستان کۆمپانیای نەوتی باکوور و کۆمپانیاکانی نەوت، لەبارەی هەناردەکردنەوەی نەوتی کوردستان واژۆ کرا.

 

لێدوانی فەرمی: مەسرور بارزانی، سەرۆکوەزیرانی کوردستان لەبارەی هەناردەکردنەوەی نەوتی کوردستان پەیامێکی بڵاوکردەوە و ڕایگەیاند: ڕێککەوتنی ئەمڕۆی نێوان هەرێمی کوردستان و کۆمپانیاکانی بەرهەمهێنەری نەوت لەگەڵ وەزارەتی نەوتی عێراقی فیدراڵ و کۆمپانیای سۆمۆ، دەستکەوتی ماندووبوون و هەوڵی زۆری تیم و شاندەکانی هەموو لایەک بووە. بەم هەنگاوە کێڵگەکانی هەرێمی کوردستان دووبارە بە بازاڕی جیهانیی نەوت بەسترانەوە.

 

لە بەشێکی دیکەی پەیامەکەی، سەرۆکوەزیرانی کوردستان دەڵێت: دەستخۆشی لەهەموو لایەک و بەتایبەتی خەڵکی خۆڕاگری کوردستان دەکەم کە (لەم ڕۆژە مێژوییەدا) بەربەستێکی گەورەیان لە بەردەم دابینکردنی شایستە داراییەکانی خەڵکی کوردستان هەڵگرت و بە هەناردەکردنی نەوتی هەرێم، جەخت لە جێبەجێکردنی هەموو مافە دەستوورییەکانی هەرێمی کوردستان دەکەینەوە.

 

ئەوەی پێویستە بیزانیت: هەر ئێوارەی ئەمڕۆ محەممەد شیاع سوودانی سەرۆکوەزیرانی عێراق پەیامێکی بڵاوکردەوە کە تیایدا هاتبوو:  ئەمڕۆ گەیشتینە ڕێککەوتنێکی مێژوویی، دواتر وەزارەتی سامانە سروشتییەکانی هەرێمی کوردستان ئێوارەی ئەمڕۆ ڕایگەیاند، لە 48 کاتژمێری داهاتوودا هەناردەی نەوتی کوردستان دەستپێدەکاتەوە.