لەمەودوا لەڕێگەی ئۆنلاینەوە پارە بۆ زیندانیان ڕەوانە دەکرێت

ئاڤا نیوز

 

بۆ کەم کردنەوەی ڕۆتینیات ئاسانکاری زیاتر بۆ زیندانیان لەمەودوا ڕێگە دەدرێت لە ڕێگەی کارتی بانک و بەشێوەی ئۆنڵاین پارە بۆ زیندانیان لەلایەن کەسوکاریانەوە ڕەوانە بکرێت.

 

وێنە گەورەکە: لە ماوەی ڕابردوو کەسوکاری زیندانیان لە ڕێگەی لیژنەی ئەمانەتەوە پارە دەگەیشتە زیندانیان بەڵام دوای جێبەجێکردنی پارەدان لە ڕێگەی کارتی بانکی لیژنەی ئەمانە نامێنێت، ڕاستەخۆ پارە بۆ زیندانیان دەنێردرێت بەپێی ئەو بڕەی مانگانە دیاری کراوە.

 

لێدوانی فەرمی: ئیحسان عەبدوڵرەحمان، بەڕێوەبەری گشتیی چاکسازییەکانی هەرێمی کوردستان، بە ئاڤا میدیای ڕاگەیاند، ڕەزامەندیمان وەرگرتووە لە ڕێگای بانکەکانەوە لە سلێمانی و هەولێر و دهۆک، دوو کارتی بانکی بۆ زیندانەکە و خانەوادەی دروست دەکرێت، بەو هەنگاوە دەزانرێت چەند پارە بۆ زیندانی ڕەوانە کراوە و چۆن سەرفی دەکات، زیندانیەکە هەر شتێکی پێویست بێت لە ڕێگەی کارتەکەوە لە فرۆشگای زیندانەوە دەیکڕێت.

 

زانیاریی زیاتر: بەڕێوەبەری گشتیی چاکسازییەکانی هەرێمی کوردستان، دەڵێت، مانگانە بۆیان هەیە تەنیا 300 هەزار دینار لەلایەن کەسوکاریان بۆ زیندانیان ڕەوان بکرێت.

 

بۆچی گرنگە: بەوهۆی ئەم هەنگاوە ڕێگای دووری کەسوکاری زیندان نزیک دەکاتەوە، پێشتر ئەگەر کەسوکاری زیندانی پارەیان بۆ زیندان بناردبایە دەبوایە بیبەنە چاکسازییەکان و لەڕێگەی لیژنەی ئەمانەوە بۆ زیندانی دەنێردرا، بەڵام ئێستا لەناوچەی خۆیان پارە بۆ کەسوکاریان دەنێرن، هاوکات بڕی پارەی ڕەوانەکراو و خەرجکردن لە مانگێک دیار دەبێت و بڕە پارەکەش دیاری کراوە بۆ هەر مانگێک.