ترەمپ گەشبینە بە کۆتاییهێنان بە جەنگی غەززە

ئاڤا نیوز

لەبارەی هەوڵەکان بۆ کۆتاییهاتنی جەنگی غەززە کە نزیک دەبێتەوە لە ساڵی دووەمییەوە، سەرۆکی ئەمریکا ئاشكرای دەکات پێشهاتی ئەرێنی هەیە و لەمیانەی کۆبوونەوەکەشی لەگەڵ نەتانیاهۆ ئەمە پرسی سەرەکی گفتۆگۆیەکان دەبێت.

وێنە گەورەکە: هەوڵەکان بۆ کۆتاییهێنان بە جەنگی غەززە بەردەوامن، لەو چوارچێوەیەدا، دۆناڵد ترەمپ، پلانێکی 21 خاڵی داڕشتووە کە وەک گرنگترین هەوڵ تا ئێستا بۆ کۆتاییهێنان بە جەنگەکە سەیر دەکرێت.

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، ''وەڵامێکی زۆر ئەرێنیمان لەبارەی کۆتاییهێنان بە جەنگی غەززە لەلایەن هەردوو سەرکردەی ئیسرائیل و وڵاتانی عەرەبەوە وەرگرتووە سەبارەت بە پلانی ئەمریکا بۆ کۆتاییهێنان بە جەنگ، دەشڵێت، نەتانیاهۆش دەیەوێت ڕێککەوتنەکە بکات، هەمووان دەیانەوێت ڕێککەوتنەکە بکەن''.

چی ڕوودەدات: ئەمڕۆ لە کۆشكی سپی، دۆناڵد ترەمپ پێشوازی لە بنیامین نەتانیاهۆ، سەرۆکوەزیرانی ئیسرائیل دەکات و گەشبینە بەوەی کە دەتوانێت نەتانیاهۆ  ڕازی بکات بۆ کۆتاییهێنان بە جەنگەکە.

ئەوەی لەبارەیەوە دەگوترێت: نەتانیاهۆ لەگەڵ ستیڤ ویتکۆف، نوێنەری ئەمریکا بۆ ڕۆژهەڵاتی ناوەراست، جارێد کوشنەر، زاوای ترەمپ کۆدەبنەوە بۆ گفتوگۆکردن لەسەر خاڵە ناکۆکەکانیان لەسەر پلانەکەی ترەمپ پێش کۆبوونەوەی ترەمپ لەگەڵ نەتانیاهۆ کۆببێتەوە.