هەردوو وەزارەتی خوێندنی باڵای هەرێمی کوردستان و عێراق کۆدەبنەوە

ئاڤا نیوز


ئەمساڵ بڕیاری ئاڵوگۆڕی وەرگرتنی قوتابیان لە زانکۆکانی هەرێمی کوردستان و عێراق جێبەجێ دەکرێت، بۆ ئەم مەبەستە بڕیارە ئەمڕۆ وەزارەتی خوێندنی باڵای هەردوولا کۆببنەوە.

چیرۆکی سەرەکی: وەزارەتی خوێندنی باڵای هەرێمی کوردستان و وەزارەتی خوێندنی باڵای حکومەتی عێراق ڕێککەوتوون، ساڵانە 500 قوتابی هەرێمی کوردستان لە زانکۆکانی عێراق وەربگیرێن و 500 قوتابی عێراقیش لە زانکۆکانی هەرێمی کورستان وەربگیرێن، ئەم بڕیارە بۆ ئەمساڵی خوێندن جێبەجێ دەکرێت.

لێدوانی فەرمی: د. خەتاب ئەحمەد، بەڕێوەبەری گشتیی خوێندن و پلاندانان لە وەزارەتی خوێندنی باڵا، بە ئاڤا گوت: بڕیاری ئاڵوگۆڕی وەگرتنی قوتابیان ئەمساڵ جێبەجێ دەکرێت، بڕیارە ئەمڕۆ لەگەڵ وەزارەتی خوێندنی باڵا کۆببینەوە بۆ دانانی لینک و میکانیزمی چۆنیەتی پێشکەش کردنی داوکاری وەرگرتن.

د. خەتاب ئەحمەد لەبارەی کۆبوونەوەکە ئەمانەشی وت:

- دوای ئەوەی لەسەر شێوازی پێشکەش کردن ڕێککەوتین ڕایدەگەیەنین و دەرچووانی پۆلی 12ی هەردوولا دەتوانن داواکاری وەرگرتن پێشکەش بکەن.

زانیاریی زیاتر: لەو 500 کورسیەی ڕێککەوتنی لەسەر کراوە، 100 کورسی بۆ خوێندنی ماستەر و دکتۆرایە، 400 کورسی بۆ خوێندنی بەکالۆریۆسە.

بۆچی گرنگە: ئاڵوگۆڕی وەرگرتنی قوتابیان لە نێوان زانکۆکانی هەرێمی کوردستان و عێراق کاریگەری ڕاستەوخۆی دەبێت لەسەر ئاڵوگۆڕی زانستی و ئەکادیمی و کولتووری لە نێوان هەردوولا، لەهەمان کاتیش هەماهەنگی و پەیوەندی نێوان زانکۆکان زیاتر دەکات.

ئەوەی پێویستە بیزانیت: جیا لەو 500 کورسیە، ژمارەیەک کورسی خوێندن لە زانکۆکانی هەرێمی کوردستان بۆ دەرچووانی پۆلی 12ی ئامادەیی ناوچە کوردستانییەکانی دەرەوەی ئیدارەی هەرێمی کوردستان تەرخان کراوە و قوتابیانی ئەو ناوچانە دەتوانن داواکاری وەرگرتن پێشکەش بکەن.