تا کۆتایی ئەم مانگە هێڵکاری شەقامەکان لە هەولێر بەردەوام دەبێت

ئاڤا نیوز

لە چوارچێوەی ڕێکخستنەوەی شەقام و ڕێگاوبانەکان، تیمی ئەندازەی هاتووچۆی هەولێر لە هێڵکاری و کاری بۆیاغکاری لە شەقامەکان بەردەوام دەبێت.

وێنە گەورەکە: لە پاڵ دروست کردن و نۆژەنکردنەوەی شەقام و ڕێگاوبانەکان، لەهەمان کات کاری هێڵکاری و دانانی هێماکانی هاتووچۆ و ڕێکخستنیش لەلایەن ئەندازەی هاتووچۆ دەکرێت. 

لێدوانی فەرمی: سروە یاسین، بەڕێوەبەری ئەندازەی هاتووچۆی هەولێر بە ئاڤای گوت: ژمارەیەکی زۆر پڕۆژەمان جێبەجێ کردووە لە هێڵکاری و ڕێکخستنەوەی شۆستە و شەقامەکان، تایبەت بە کاری بۆیاغکاری لە کۆتایی ئەم مانگە بەردەوام دەبین.

لە دوایین پڕۆژەمان تیمی هێڵکاری بەشی ئەندازەی هاتووچۆی هەولێر هێڵکاری بۆ ڕێگای سەرەکی کەورگۆسک بە ئاڕاستەی دهۆک کرد کە درێژی ڕێگاکە هەشت کیلۆمەترە و بەردەوام هاتووچۆی زۆری هاونیشتمانیان و جووتیارانی سنوورکە بەم ڕێگایەدا دەکرێت.

بۆچی گرنگە: هێڵکاری و دانانی هێماکانی هاتووچۆ و ڕێکخستنی شەقامەکان جیا لەوەی سیمای شەقام و ڕێگاوبانەکان جوانتر دەکات، ئاسانکاری زۆریش دەکات لە هاتووچۆی شۆفێران.

ئەوەی پێویستە بیزانیت: بەگوتەی سروە یاسین، کاری بۆیاغ و هێڵکاری شۆستە و شەقامەکان دەبێت لەو کاتانە بکرێت پلەی گەرمی بەرز بێت، چونکە پلەی گەرمی بەرز ئاسانکاری زیاتر بۆ پرۆسەکە دەکات و کاری بۆیاغکاریش سەرکەوتووتر دەبێت.