وۆڵ ستریت جۆرناڵ: ئەمریکا هاوکاری ئۆکراینا لە بەئامانجگرتنی ژێرخانی وزەی ڕووسیا دەکات

ئاڤا نیوز

لە کاتێکدا شەڕی ڕووسیا و ئۆکراینا بەردەوامە و هەوڵەکان بۆ پێشخستنی دانوستانەکانی ئاشتی وەستاون، ڕۆژنامەیەکی ئەمریکی ئاشكرای دەکات ئەمریکا پشتیوانی خۆی بۆ ئۆکراینا قووڵتر دەکاتەوە بە پێدانی زانیاری هەوڵگریی کە تێیدا دەتوانێت ئامانجی زیاتر لە ڕووسیا بپێکێت

بڵاوکراوەی فەرمی: ڕۆژنامەی وۆڵ ستریت جۆرناڵـی ئەمریکی لەزاری بەرپرسانی ئەمریکییەوە بڵاویکردووەتەوە، ''ئەمریکا بە نیازە زانیاری هەواڵگری پێشکەش بە ئۆکراینا بکات کە بەهۆیەوە بتوانێت هێرشی دوورمەودا بۆ سەر ژێرخانی ڕووسیا ئەنجام بدات، هاوکات لە ڕێگەی ئەم هەنگاوە کێیڤ دەتوانێت باشتر پاڵاوگە و بۆری و وێستگەکانی کارەبا و ژێرخانی دیکەی دووری ڕووسیا بکاتە ئامانج، بەهۆیەوە لە ڕووی ئابوورییەوە زیانێکی گەورە بە مۆسکۆ دەکەوێت''

زانیاریی بەدەستهاتوو: بەرپرسان دەشڵێن، یەکەمجارە ئیدارەی ترەمپ بە مووشەکی دوور مەودا لە دژی ئامانجە وزەییەکان لە قووڵایی خاکی ڕووسیا هاوکاری ئۆکراینا بکات لە ئەنجامدانی هێرشەکانی، هاوکات بەرپرسانی ئەمریکا داوایان لە ئەندامانی ناتۆش کردووە پاڵپشتی هاوشێوە پێشكەش بە ئۆکراینا بکەن.

ئەوەی لەبارەیەوە دەگوترێت: هەرچەندە دەزگای هەواڵگریی بەرگری هیچ لێدوانێکی لەسەر ئۆپەراسیۆنە هەواڵگرییەکانی نەدا، بەڵام وەک ئاشکرایە زانیارییە هەواڵگرییەکان لەگەڵ چەکی بەهێزتردا، دەتوانێت کاریگەرییەکی زۆر بەهێزتری هەبێت.