بە بڕیاری ئەردۆغان، سەروەت و سامانی 20 کەسایەتی و 18 دامەزراوەی ئێرانی سڕ کران

ئاڤا نیوز

بە هۆی ڕۆڵگێڕان لە پەرەپێدانی بەرنامەی ئەتۆمیی ئێران و وەک پابەندبوون بە بڕیارەکانی ئەنجوومەنی ئاسایشی نێودەوڵەتی، تورکیا بڕیاری دا سەروەت و سامانی 20 کەسایەتی و 18 دامەزراوەی ئێرانی سڕ بکات.

بڵاوکراوەی فەرمی: بەپێی بڕیارێک کە بە واژووی ڕەجەب تەیب ئەردۆغان، سەرۆککۆماری تورکیا لە ڕۆژنامەی فەرمیدا بڵاو کراوەتەوە، وەک پابەندبوون بە بڕیارەکانی ئەنجوومەنی ئاسایشی نێودەوڵەتی لە تورکیا سەروەت و سامانی 20 کەسایەتی و 18 دامەزراوەی ئێرانی سڕ دەکرێت.

ئەوەی پێویستە بیزانیت: سەرجەم ئەو 20 کەسە هاووڵاتیی ئێرانین و دامەزراوەی وزەی ئەتۆمی ئێران، بانک سپا، بانکی نێودەوڵەتیی سپا و بنکەی لێکۆڵینەوە و بەرهەمهێنانی ئەتۆمی لە هەریەک لە ئیسفاهان، کەرەج و چەندین کۆمپانیا و دامەزراوەی دیکەی بەرهەمهێنانی ئەتۆمی لە لیستی ئەو 18 دامەزراوە ئێرانییەدان کە بەر سزاکە کەوتوون. 

بە تەنیشت ئەم بابەتەوە: لە بڕیارەکەدا هاتووە ئەو کەسایەتی و دامەزراوانەی سەروەت و سامانەکانیان لە تورکیا سڕ کراوە، دەتوانن بەپێی بڕگەی چوار لە ماددەی دووەمی یاسای ژمارە 7262 لە ڕێگای لیژنەی هەماهەنگی و چاودێری داواکاری پێشکەش بکەن و داواکارییەکەیان دەگەیێنرێتە ئەنجوومەنی ئاسایشی نێودەوڵەتی. 

زانیاریی زیاتر: ئەم بڕیارەی تورکیا دوای ئەوە دێت ئەمڕۆ هەفتەیەکی تەواو بەسەر کۆبوونەوەی لووتکە لە نێوان دۆناڵد ترەمپ و ئەردۆغاندا تێدەپەڕێت و دوای کۆبوونەوەکەش واژۆیان لەسەر چەندین ڕێککەوتننامە کرد.