قۆناغی یەکەمی پلانەکەی ترەمپ دەستپێدەکات

ئاڤا نیوز

سەرۆکی ئەمریکا پێشوازی لە وەڵامی حەماس بۆ پلانەکەی دەکات و دەڵێت: حەماس ئامادەیە بۆ ئاشتی و داواش لە ئیسرائیل دەکات بۆردومانەکانی بۆ سەر کەرتی غەززە ڕابگرێت.

چیرۆکی سەرەکی: دوای ئەوەی دۆناڵد ترەمپ، سەرۆکی ئەمریکا پلانی 20 خاڵی ئاشتی بۆ غەززە  خستەڕوو، هەر دوای ڕاگەیاندنی پلانەکە ئیسرائیل ئامادەیی خۆی دەربڕی و دوێنی حەماس وەڵامی پلانەکەی بە ئەرێنی دایەوە و بەمەش ڕاستەوخۆ قۆناغی یەکەمی پلانەکەی ترەمپ دەستپێدەکات.

بڵاوکراوەی فەرمی: دۆناڵد ترەمپ، سەرۆکی ئەمریکا دوای وەڵامەکەی بزووتنەوەی حەماس لە گرتە ڤیدۆییەکدا ڕایگەیاند، ئەمە ڕۆژێکی گەورەیە، بە خۆشحاڵییەوە چاوەڕێی ئەوە دەکەین بارمتەکان بێنەوە ماڵەوە بۆ لای دایک و باوکیان، هاوکات جەختی لەوەکردەوە، کە زۆر نزیکین لە گەیشتن بە ئاشتی لە ڕۆژهەڵاتی ناوەڕاستدا، داواشی لە ئیسرائیل کرد بۆردومانەکانی لە غەززە ڕابگرێت.

ڕاگەیێنراوی فەرمی: نووسینگەی بنیامین نەتانیاهۆ، سەرۆکوەزیرانی ئیسرائیل، ئەمڕۆ شەممە ڕایگەیاند، ئیسرائیل ئامادەکاری دەکات بۆ ئەوەی "دەستبەجێ قۆناغی یەکەمی پلانەکەی ترەمپ بۆ غەززە جێبەجێ بکات"، داوای ئازادکردنی سەرجەم بارمتەکان دەکات ئاماژە بەوەش دەکات ئەو بنەمایانەی ئیسرائیل دایانناوە لەگەڵ دیدگای ترەمپدا یەکدەگرێتەوە.

ئەمەش بزانە: قۆناغی یەکەمی پلانەکەی ترەمپ بۆ ئاشتی ئەمانە لەخۆدەگرێت، ئاگربەستی دەستبەجێ و ڕاگرتنی هێرشەکانە، ئازادکردنی هەموو بارمتەکان، زیندوو و مردوو، لە ماوەی 72 کاتژمێردا، دەستپێکردنی گەیاندنی یارمەتییە مرۆییەکان و گەڕاندنەوەی خزمەتگوزارییە سەرەتاییەکانە.