وەزیری پەروەردە: پلانمان هەیە لە داهاتوودا قوتابخانەی کوردی لە چەند وڵاتێک بکەینەوە

ئاڤا نیوز

 

ئەمڕۆ یەکشەممە 5-10-2025، کۆرسێکی دیکەی خولی فێربوونی زمانی کوردی بۆ کوردانی دەرەوەی وڵات دەستی پێ کرد، وەزیری پەروەردەش دووپاتی کردەوە پلانیان هەیە لە داهاتوودا قوتابخانەی کوردی لە چەند وڵاتێک بکەنەوە.

 

وێنە گەورەکە: لە کابینەی نۆیەمی حکومەتی هەرێمی کوردستان، بەڕێوەبەرایەتیی خوێندنی دەرەوەی وڵات لە وەزارەتی پەروەردە کرایەوە، یەکێک لە ئەرکەکانی ئەو بەرێوەبەرایەتییە ئەوەیە منداڵانی کوردی دەرەوەی وڵات فێری زمانی کوردی بکات.

 

ئەوەی ئێستا ڕوودەدات: ئەمڕۆ کۆرسێکی نوێی ئۆنلاین بۆ فێربوونی زمانی کوردی بۆ ژمارەیەک منداڵی کوردی دەرەوەی وڵات کرایەوە.

 

لێدوانی فەرمی: ئالان حەمە سەعید، وەزیری پەروەردەی هەرێمی کوردستان ڕایگەیاند، لەسەر ڕاسپاردەی سەرۆکوەزیران مەسرور بارزانی و بە هەماهەنگی لەگەڵ کۆنفیدراسیۆنی ڕەوەندی کوردی کار لەسەر ئەوە دەکەین منداڵانی کورد لەهەر وڵاتێک بن فێری زمانی کوردییان بکەین.

 

وەزیری پەروەردە ئەمانەشی وت:

- وانەکانی کۆرسی فێربوونی زمانی کوردی هەموو ڕۆژانی یەکشەممە بە ئۆنلاین دەبێت، وانەکانیش بەهەرسێ شێوەزاری سۆرانی، بادینی و کرمانجی دەوترێنەوە.

 

- خولەکە لە چوار ئاست پێکدێت، دوای تەواوکردنی هەرچوار ئاستەکە بەشداربووان بڕوانامەی وەزارەتی پەروەردەی هەرێمی کوردستانیان پێدەدرێت.

 

- تا ئێستا هەزار منداڵی کوردی دەرەوەی وڵات خولی فێربوونی زمانی کوردییان تەواو کردووە، زیاتر لە دوو هەزار منداڵی دیکەش ناوی خۆیان تۆمار کردووە بۆ ئەوەی بەشداری لەو خولە بکەن.

 

- بۆ ساڵی داهاتوو کار لەسەر ئەوە دەکرێت کتێبەکانی پرۆگرامی خوێندن بۆ ئەو قوتابخانانەی دەرەوەی وڵات ڕەوانە بکرێت کە ژمارەیەک مامۆستا لە ڕۆژانی شەممە و یەکشەممە بە خۆبەخشی وانە بە منداڵانی کورد دەڵێنەوە.

 

- پلانی ئەوە هەیە حکومەتی هەرێمی کوردستان لە داهاتوو قوتابخانە لە چەند وڵاتێک بکاتەوە.

 

بۆچی گرنگە: ئەو منداڵانەی بەشداری لەو خولە دەکەن فێری نووسین، خوێندنەوە و قسەکردن بە زمانی کوردی دەکرێن، ئەمەش هەنگاوێکە گرنگە بۆ ئەوەی ئەو منداڵانە شارەزای زمانی دایکییان و بە مێژوو و فەرهەنگ و کولتوور نەتەوەیی خۆیان ببن.