ڕووسیا 251 دڕۆنی ئۆکراینی تێکدەشکێنێت

ئاڤا نیوز

درەنگانی شەوی ڕابردوو ئۆکراینا هێرشێکی بەرفراوانی بۆسەر ڕووسیا ئەنجامدا، کە بە یەکێک لە گەورەترین هێرشە تۆڵەسێنەکانی کیێڤ بۆ سەر مۆسکۆ دادەنرێت.

وێنە گەورەکە: جەنگی نێوان ڕووسیا و ئۆکراینا نزیکەی سێ ساڵە بەردەوامە، سەرەڕای هەوڵەکان بۆ کۆتاییهێنان بە جەنگەکە، بەڵام هەردوو وڵات بەردەوامن لە هێرش بۆسەر یەکتر.

ڕاگەیێنراوی فەرمی: وەزارەتی بەرگری ڕووسیا ئەمڕۆ دووشەممە ڕایگەیاند، لە شەوی ڕابردوودا سیستمی ئاگادارکردنەوەی بەرگری ئاسمانی ڕووسیا توانی 251 دڕۆنی ئۆکراینی لەناو ببات و تێکیانبشکێنێت.

زانیاریی بەدەستهاتوو: پارێزگاری شاری بێلگۆرۆدی ڕووسیا لەبارەی هێرشەکەی ئۆکراینا وتی، ئەم ‌هێرشەی کێیڤ بۆ سەر مۆسکۆ زیانی بە ژێرخانی کارەبا گەیاندووە و هەزاران کەسی ناوچەکە بێ کارەبا ماونەتەوە.

زانیاریی زیاتر: ئۆکراینا لەم ماوەیەدا هێرشەکانی بۆ سەر ڕووسیا چرتڕکردووەتەوە بەئامانجی لاوازکردنی ژێرخانی وزەی ڕووسیا.