ئەمریکا بە مەرج بەشداری دانوستانەکانی حەماس و ئیسرائیل دەبێت

ئاڤا نیوز

حەماس و ئیسرائیل لەسەر پلانەکەی ترمپ بۆ ئاشتی لە ‌غەززە ڕێککەوتوون، هەردوولا ئەمڕۆ دووشەممە لەڕێگەی نێوەندگێڕان(میسر، قەتەر و ئەمریکا) دانوستان لەبارەی پلانەکە دەکەن، بەڵام سەرچاوەیەکی ئیسرائیلی ئاشكرای دەکات، لەئەگەری بەدیهاتنی پێشکەوتنی خوازراو ئەو کات نێردراوی ئەمریکا سبەی بەشداری دانوستانەکان دەکەن

وێنە گەورەکە: ئەمڕۆ دووشەممە، میسر میوانداری شاندەکانی ئیسرائیل و حەماس دەکات بۆ تاوتوێکردنی بارودۆخی زەمینی و وردەکارییەکانی ئاڵوگۆڕی بارمتە و زیندانییەکان، بە پێی پێشنیازی دۆناڵد ترەمپ، سەرۆکی ئەمریکا، ترەمپیش ڕایگەیاندووە، ڕێککەوتنی غەززە " ڕێککەوتنێکی گەورەیە بۆ ئیسرائیل و جیهانی عەرەبی و هەموو جیهان"، جەختیشی کردەوە کە دانوستانەکان لەسەر ڕێککەوتنەکە زۆر بە باشی بەرەوپێش دەچن.

زانیاریی بەدەستهاتوو: ڕادیۆی ئیسرائیل ئاشکرای کرد، سەرۆکی شاندی ئیسرائیل و ستیڤ ویتکۆف نوێنەری ئەمریکا  و جارێد کوشنەر زاوای ترەمپ بەشداری دانوستانەکانی ئەمڕۆ لەگەڵ بزووتنەوەی حەماس لە شەرم ئەلشێخی میسر ناکەن، بەڵکو ئەگەر پێشکەوتنی خوازراو بەدەستبهێنرێت، ئەو کات سەرۆکی شاندی ئیسرائیل و نێردراوانی ئەمریکا سبەی بەشداری دانوستانەکان دەکەن.