نێردەی سەرۆکی ئەمریکا سەردانی ڕۆژئاوای کوردستان دەکات

ئاڤا نیوز

نێردەی سەرۆکی ئەمریکا بۆ کاروباری سووریا سەردانی ڕۆژئاوای کوردستانی کرد و ڕایگەیاند، بەمەبەستی بەهێزکردنی یەکڕیزی سوورییەکان، ئاشتی و خۆشگوزەرانی هاوبەش لەو وڵاتەدا، گفتوگۆی بنەڕەتی و گرنگی لەگەڵ فەرماندەی گشتیی هێزەکانی سووریای دیموکرات (هەسەدە) ئەنجامداوە.

وێنە گەورەکە: سەردانی بەرپرسانی ئەمریکا بۆ ڕۆژئاوای کوردستان هاوکاتە لەگەڵ پەککەوتنی دانوستانەکانی نێوان ئیدارەی خۆسەری و دیمەشق و بەڕێوەچوونی هەڵبژاردنی پەرلەمانی سووریا بەبێ بەشداری ناوچەکانی ژێر کۆنتڕۆڵی هەسەدە، هەڵبژاردنێک کە ئیدارەی خۆسەری بە "شانۆیی" ناوی برد و ڕایگەیاند، هەڵبژاردنەکەی دوێنێ ڕەنگدانەوەی ئیرادەی تەواوی سوورییەکان ناکات.

ڕاگەیێنراوی فەرمی: تۆما باراک، نێردەی سەرۆکی ئەمریکا بۆ کاروباری سووریا لە هەژماری تایبەتی خۆی لە تۆڕی ئێکس بڵاویکردەوە، ئەمڕۆ بە هاوڕێیەتی ئەدمیڕاڵ براد کوپەر، فەرماندەی فەرماندەیی ناوەندی ئەمریکا (سێنتکۆم)، سەردانی باکوور و ڕۆژهەڵاتی سووریای کردووە و گفتوگۆی بنەڕەتی و گرنگیی لەگەڵ مەزڵووم عەبدی، فەرماندەی گشتیی هێزەکانی سووریای دیموکرات (هەسەدە) ئەنجامداوە.

ئاماژەی بەوەشداوە، سەردانەکە بەشێکە لە هاندانێکی گەورە لە چوارچێوەی ڕوانگەی سەرۆکی ئەمریکا بۆ "پێدانی دەرفەتێک بە سووریا"، ئەویش لەڕێگەی بەهێزکردنی سوورییەکان لەڕێگەی پتەوکردنی یەکڕیزی ناوخۆییان، ئەوەش وەک هەوڵێکی نوێ لەپێناوی ئاشتی و خۆشگوزەرانی هاوبەش.

لەلایەکی دیکەوە: میدیای ڕۆژئاوای کوردستانیش لە ئیدارەی خۆسەرەوە بڵاویکردووەتەوە، لە کۆبوونەوەکەدا کە بەرپرسانی ئیدارەی خۆسەریی و ئەنجوومەنی سووریای دیموکرات (مەسەدەش ئامادەی بوون، گفتوگۆ لەسەر پەلەکردن لە جێبەجێکردنی ڕێککەوتنی 10ی ئازاری نێوان ئیدارەی خۆسەر و دیمەشق کراوە، هەروەها هەڵگرتنی سزاکانی سووریا، ڕەخساندنی ژینگەیەکی لەبار بۆ وەبەرهێنان و گەشەپێدان لەگەڵ گەڕانەوەی ئاوارەکان بۆ ناوچەکانیان تاوتوێ کراوە.

ئاماژەی بەوەشکردووە، لە کۆبوونەوەکەدا جەخت کراوەتەوە لەسەر بەردەوامی هاوبەشی نێوان هاوپەیمانی نێودەوڵەتی و هەسەدە بۆ ڕووبەڕووبوونەوەی داعش، پاراستنی ئارامی باکوور و ڕۆژهەڵاتی سووریا و پاراستنی یەکێتی و سەروەری سووریا کراوەتەوە.