وەزیرانی دەرەوەی تورکیا و سووریا کۆدەبنەوە

ئاڤا نیوز

لە کاتێکدا تا دێت گرژییەکانی نێوان هەسەدە و ‌حکومەتی کاتیی سووریا زیاتر تەشەنە دەسێنن، سبەی وەزیرانی دەرەوەی تورکیا و سووریا کۆ دەبنەوە و ڕۆژنامەی تورکیا نزیک لە ئاک پارتی'یش نووسیوویەتی ئەگەر هەسەدە تیکەڵی سوپای سووریا نەبێت، ئەوا هەردوو سوپای تورکیا و سووریا پێکەوە ڕووبەڕووی هەسەدە دەبنەوە.

وێنە گەورەکە: لە دوای ڕووبەڕووبوونەوەکەی شەوی ڕابردوو لە نێوان خۆپیشاندەران و هێزە چەکدارەکان لە گەڕەکە کوردییەکانی شێخ مەقسود و ئەشرەفییە لە ‌حەلەب، گرژییەکانی نێوان هەسەدە و ‌حکوومەتی کاتی سووریا زیاتر تەشەنە دەستێنێت و وەزیری دەرەوەی سووریاش لە تورکیایە.

بڵاوکراوەی فەرمی: ڕۆژنامەی تورکیا بڵاوی کردووەتەوە بڕیارە سبەی هاکان فیدان، وەزیری دەرەوەی تورکیا لەگەڵ هاوتا سوورییەکەی، ئەسعەد ‌حەسەن شەیبانی کۆببنەوە و یەکێکیش لە تەوەری گفتوگۆکانیان پرۆسەی تێکەڵبوونی هەسەدە دەبێت لەگەڵ سوپای نوێی سووریا.

بە تەنیشت ئەم بابەتەوە: ڕۆژنامەکە لە زاری گەورە بەرپرسانی تورکیاوە سەرنجی خستووەتە سەر ئەوەی تورکیا مانەوەی هەسەدە وەک هەڕەشە بۆ سەر یەکپارچەیی خاکی سووریا و ئاسایشی نیشتمانیی خۆی دەزانێت، ئەگەر هەسەدە تێکەڵی سوپای نوێی سووریا نەبێت ئەوا تورکیا پشتیوانی لە سووریا دەکات و سوپای تورکیا و سووریا ئۆپەراسیۆنی سەربازیی هاوبەش بۆ سەر هەسەدە ئەنجام دەدەن.

ئەوەی پێویستە بیزانیت: بەپێی ئەو ڕێککەوتنەی 10.3.2025 لەنێوان ئە‌حمەد شەرع، سەرۆککۆماری سووریا و مەزڵوم عەبدی، فەرماندەی گشتیی هەسەدە واژووی لەسەر کرا، دوو مانگ و شەش مانگی ماوە وەک دوا وادە بۆ تێکەڵبوونی هەسەدە لەگەڵ سوپای سووریا، بەڵام بە هۆی ناکۆکییەکانی نێوان هەسەدە و ‌حکوومەتی کاتیی سووریا هێشتا پرۆسەکە دەستی پێ نەکردووە.  

زانیاریی زیاتر: بڵاوکردنەوەی ئەم هەواڵە لەلایەن ڕۆژنامەی تورکیاوە لە کاتێکدایە، چەند ڕۆژێک لەمەوبەر سوپای تورکیا و سوپای سووریا ئۆپەراسیۆنێکی هاوبەشیان لە ئیدلب بۆ سەر ڕێکخراوی تیرۆریستی داعش ئەنجام دا. ئەمەش بووە یەکەم ئۆپەراسیۆنی سەربازی هاوبەشی ئەم دوو وڵاتە.