وەزیری بەرگری سووریا: لەگەڵ مەزڵووم عەبدی کۆبوومەوە و لەسەر ڕاگەیاندنی ئاگربەست ڕێککەوتین

ئاڤا نیوز

وەزیری بەرگری سووریا و فەرماندەی گشتی هەسەدە لە دیمەشق کۆبوونەوە و لەسەر ڕاگرتنی شەڕ و گرژییەکان لە سەرجەم ناوچەکانی باکوور و ڕۆژهەڵاتی سووریا ڕێککەوتن، ڕێککەوتنەکەش دەستبەجێ دەکەوێتەبواری جێبەجێکردنەوە.

وێنە گەورەکە:  شەوی ڕابردوو لە هەردوو گەڕەکی شێخ مەقسود و ئەشرەفیەی شاری حەلەب لە باکووری سووریا، شەڕ  وپێکدادان لەنێوان هێزەکانی ئاسایشی سەر بە ئیدارەی خۆسەر و هێزەکانی سەر بە دیمەشق ڕوویدا و لە ئەنجامدا دوو کەس گیانیان لەدەستدا و دەیانی دیکەش برینداربوون، ئەوەش مەترسی دروستبوونی گرژی فراوانتری لە بەرەکانی دیکە لەنێوان هەسەدە و هێزەکانی سووریا دروستکرد.

ڕاگەیێنراوی فەرمی: مەرهەف ئەبو قەسرە، وەزیری بەرگری سووریا لە هەژماری خۆی لە تۆڕی ئێکس بڵاویکردەوە، ئەمڕۆ سێشەممە لە دیمەشق لەگەڵ مەزڵوم عەبدی کۆبووەتەوە و هەردوولا ڕێککەوتن لەسەر ڕاگرتنی شەڕ و گرژییەکان لە هەموو شوێن و خاڵەکان کە هێزی سەربازییەکان لە باکوور و باکووڕی ڕۆژهەڵاتی سووریا تیایدا بڵاوبوونەتەوە، ڕێککەوتنەکەش ڕاستەوخۆ دەکەوێتەبواری جێبەجێکردنەوە.