ئەنجوومەنی وەزیران نووسراوی فەرمی بۆ دامەزراندنی 168 کەس بۆ قەزای کفری دەرکرد

ئاڤا نیوز

بەگوێرەی نووسراوێک کە کۆپییەکی دەست ئاڤا کەوتووە دیوانی ئەنجوومەنی وەزیران نووسراوی فەرمیی بۆ دامەزراندنی 168 کەس بۆ قەزای کفری سەر بە ئیدارەی گەرمیان بە واژووی ئومێد سەباح، سەرۆكی دیوانی ئەنجوومەنی وەزیرانی کوردستان دەركرد.

 

وێنە گەورەکە: دوای ئەوەی لە ماوەی ڕابردوودا سەرۆكوەزیران مەسرور بارزانی فەرمانی دا بە دامەزراندنی 168 گەنجی دانیشتووی قەزای كفری، دیوانی ئەنجوومەنی وەزیرانی هەرێمی كوردستان بە نووسراوی فەرمی، فەرمانی دامەزراندنەكەی دەركرد و تاكە مەرجیش ئەوەیە كە ئەو كەسانە هیچ مووچەیەكی دیكەیان لە دامودەزگا فەرمییەكان نەبێت.

 

ئەوەی پێویستە بیزانیت: دامەزراندنی ئەو 168 کەسەی دانیشتووی كفری لە پسپۆڕی جیا جیا لە فەرمانگە و بەرێوەبەرایەتییەکانی سنووری قەزای کفری دەبێت و بە شێوەی گرێبەست دەبێت.

 

زانیاریی تایبەت: سەرچاوەیەکی ئاگادار لە ئەنجوومەنی وەزیرانی حکومەتی هەرێمی کوردستان بۆ  ئاڤا میدیا جەختی كردەوە كە لە ڕۆژی 6-10-2025، دیوانی ئەنجوومەنی وەزیران نووسراوی فەرمیی فەرمانی دامەزراندنەكەی بە واژووی ئومێد سەباح، سەرۆكی دیوان دەركردووە.

 

لەسەر فەرمانی سەرۆكوەزیران مەسرور بارزانی، بڕیار درا بە دامەزراندنی ئەو كەسانەی كە ناویان لە لیستی هاوپێچدا هاتووە، بەشێوەی گرێبەست لەسەر میلاكی ئەو شوێنانەی لە لیستەكە دیاركراون لە سنووری ئیدارەی سەربەخۆی گەرمیان - قەزای كفری، هاوكات خەرجكردنی مووچەی ئەو كەسانە بەپێی ڕێنمایی دارایی ژمارە 10ی ساڵی 2019 دەبێت، لەسەر داهاتی ناوخۆی حكومەتی هەرێمی كوردستان.