شاندی ئەمریکا بۆ دانوستانەکانی غەززە گەیشتنە شەرم شێخ

ئاڤا نیوز

 

لەچوارچێوەی هەوڵەکان و جێبەجێکردنی پلانی 20 خاڵی ترەمپ بۆ ڕاگرتنی جەنگی غەززە شاندی دانوستاندنکاری ئەمریکا گەیشتە شەرم شێخ لە میسر.

 

وێنە گەورەکە: میسر میوانداری دانوستاندنی ناڕاستەوخۆی نێوان ئیسرائیل و حەماسی کرد و  گەڕی یەکەمی دانوستاندنی نێوان هەردوولا بەنێوەندگیریی میسر بەڕێوەچوو و گفتوگۆیان لەبارەی پلانەکەی ترمپ بۆ ئاشتی لە ‌غەززە کرد تاوەکو ئێستاش گفتوگۆیەکان بەردەوامن.

 

زانیاریی بەدەستهاتوو: ماڵپەری ئاکسیۆس ئاشكرای کرد، ''ستیڤ ویتکۆف، نێردەی دۆناڵد ترەمپ، سەرۆکی ئەمریکا بۆ ڕۆژهەڵاتی ناوەڕاست و جارێد کوشنەر، زاوای ترەمپ، چوارشەممە گەیشتوونەتە شاری شەرم شێخی میسر بۆ بەشداریکردن لە دانوستانەکانی ئاگربەستی غەززە .''

 

زانیاریی زیاتر: هەمان سەرچاوە دەشڵێت، ئیدارەی ترەمپ فشارێکی تووند دەخاتە سەر هەردوو ئیسرائیل و حەماس بۆ ئەوەی لە چەند ڕۆژی داهاتوودا بگەنە ڕێککەوتنێکی هەمەلایەنە، لەنێویاندا ئاگربەستی هەمیشەیی و ئازادکردنی سەرجەم بارمتەکان.

 

لێدوانی فەرمی: لەسەر هەمان پرس ترەمپ گەشبینی خۆی دەربڕی سەبارەت بە هەبوونی پێشکەوتن لە دانوستاندنەکان و ڕایگەیاند، تیمی ئەمریکا بۆ بەشداریکردن لە دانوستانەکان بەرەو میسر بەڕێکەوتوون.

 

ئەوەی لەبارەیەوە دەگوترێت: سەرچاوەیەکی میسری ئاگادار لە دانوستاندنەکان وتوویەتی،'' قۆناغی یەکەمی پلانی ترەمپ لە غەززە پێش ڕۆژی هەینی یەکلایی بکرێتەوە، ئەگەر ئەو کەشوهەوای ئەرێنییەی ئێستا لە دانوستانەکاندا هەیە؛ بەردەوام بێت.''