شەقامەکانی شاری سەدر لە بەغدا خاڵین لە دیمەنی بانگەشەی هەڵبژاردن

ئاڤا نیوز

شاری سەدر، گەورەترین گەڕەکی بەغدا کە زیاتر لە چوار ملیۆن کەس تێیدا نیشتەجێیە، بە تەواوی خاڵییە لە پۆستەر و دروشمی بانگەشەی هەڵبژاردن.

چیرۆکی سەرەکی: سەرەڕای دەستپێکردنی وادەی بانگەشە بۆ خولی شەشەمی پەرلەمانی عێراق لە 3ـی ئەم مانگەوە. شەقامەکانی شاری سەدر پێچەوانەی زۆربەی ناوچە و گەڕەکەکانی دیکەی پایتەختە کە پڕن لە وێنەی بەربژێر و لافیتەی حیزبی دەبینرێن.

هۆکارە زانراوەکان: هۆکاری سەرەکی ئەم دۆخە دەگەڕێتەوە بۆ بایکۆتکردنی هەڵبژاردن لەلایەن موقتەدا سەدر، ڕێبەری ڕەوتی نیشتمانیی شیعەوە. زۆرینەی هەرە زۆری دانیشتووانی شاری سەدر لایەنگری سەدرن و بڕیارەکەی کاریگەرییەکی گەورەی لەسەر ئەم ناوچەیە داناوە. سەدر چەند ڕۆژێک لەمەوبەر خۆی لەو کاندیدانەش بێبەری کرد کە سەر بە ڕەوتەکەی بوون و چوونە ناو کێبڕکێی هەڵبژاردنەوە.

ئەوەی پێشبینی دەکرێت: ئەم دۆخە پێشبینی دەکرێت ڕێژەی بەشداریکردن لە شاری سەدر بە شێوەیەکی بەرچاو کەم بکاتەوە و ڕەنگە لە 20% تێپەڕ نەکات. هەمان کاریگەری تا ڕادەیەک لە گەڕەکەکانی شوعلە و حوڕڕییەش بەدی دەکرێت، کە ئەوانیش ژمارەیەکی زۆر لە لایەنگرانی ڕەوتی سەدریان تێدایە. ئەمەش وەک دیمەنێکی نوێ لە گۆڕەپانی هەڵبژاردنەکانی عێراقدا سەیر دەکرێت.