سەرەڕای ڕێککەوتن، ئیسرائیل هێرشی کردە سەر غەززە؛ کوژراو و بریندار هەیە

ئاڤا نیوز

 

سەرەڕای ڕێککەوتنی شاندەکانی دانوستانی ئیسرائیل و حەماس، سوپای ئیسرائیل هێرشێکی نوێی کردە سەر غەززە و چوار کەس کوژران.

 

بۆچی گرنگە: ئەم هێرشە لەکاتێکدایە بەرەبەیانیی ئەمڕۆ پێنجشەممە دۆناڵد ترەمپ، سەرۆکی ئەمریکا لە تۆڕی کۆمەڵاتیی ترووس سۆشیاڵ ڕایگەیاند، هەریەک لە بزووتنەوەی حەماس و ئیسرائیل لەسەر قۆناغی یەکەمی پلانی ئاشتی لە غەززە ڕێککەوتن.

 

لێدوانی فەرمی: بەرگریی شارستانیی غەززە ڕایگەیاند، لە هێرشێکی ئیسرائیل بۆ سەر شاری غەززە لانیکەم چوار کەس کوژراون و 40ـی دیکەش بێسەروشوێن بوون.

 

زانیاریی زیاتر: پێشتر حەماس ڕایگەیاندبوو کە گەرەنتی لە ئەمریکا وەرگرتووە ئیسرائیل هێرشەکانی بوەستێنێت.

 

ئەمەش بزانە: ڕێککەوتنی نێوان شاندەکانی حەماس و ئیسرائیل بۆ ئەوەی بچێتە بواری جێبەجێبوونەوە پێویستیی بەوەیە لەلایەن حکومەتی ئیسرائیلەوە پەسەند بکرێت.

 

باکگراوەند: بەگوێرەی ڕێککەوتنی ئاشتیی غەززە ئاڵوگۆڕی بارمتە و دیلەکان دەکرێت، شەڕ دەوەستێت و سوپای ئیسرائیل لە کەرتی غەززە دەکشێتەوە.