بەرگریی شارستانیی غەززە: نزیکەی 200 هەزار ئاوارە گەڕاونەتەوە باکووری کەرتەکە

ئاڤا نیوز

 

هاوکات لەگەڵ کەوتنە بواری جێبەجێکردنی ئاگربەست لە کەرتی غەززە، شەپۆلێکی بەرفراوانی گەڕانەوەی ئاوارەکان لە باشوورەوە بۆ ناوچەکانیان لە باکوور دەستیپێکردووە. بەرگریی شارستانیy غەززە ڕایگەیاندووە کە تا ئێستا نزیکەی 200 هەزار کەس ماڵ و حاڵی خۆیان جێهێشتبوو، گەڕاونەتەوە.

 

چیرۆکی سەرەکی: بەرەبەیانیی ڕۆژی پێنجشەممە دۆناڵد ترەمپ، سەرۆکی ئەمریکا ڕایگەیاند، هەریەک لە حەماس و ئیسرائیل بە پلانی ڕێککەوتنی ئاشتیی غەززە ڕازی بوون و واژۆیان کردووە، دواتریش هەردوولایەنی شەڕەکە [حەماس و ئیسرائیل] ڕێککەوتنەکەیان پشتڕاست کردەوە.

 

دوای ڕاگەیاندنی پلانی ئاشتی غەززە لەلایەن دۆناڵد ترەمپ، سەرۆکی ئەمریکا، ئیسرائیل و حەماس بە خاڵەکانی نێو پلانەکە ڕازی بوون و بەرەبەیانی ئەمڕۆ پێنجشەممە، ئاشتی لە گەززە ڕاگەیێنرا.

 

لێدوانی فەرمی؛ مەحمود باسال، وتەبێژی بەرگریی شارستانیی غەززە لە لێدوانێکدا ئەم ئامارەی پشتڕاست کردەوە و ڕایگەیاند، "لە ڕۆژی هەینییەوە، کە ئاگربەست دەستیپێکردووە، نزیکەی 200 هەزار کەس لە ئاوارەکانی باشوورەوە بەرەو باکووری غەززە گەڕاونەتەوە."

 

هاوکات، شاری خان یونس لە باشووری کەرتی غەززە، کە بەهۆی بۆردومانە چڕەکانی ئیسرائیلەوە ڕووبەڕووی وێرانکارییەکی گەورە بووەتەوە، جموجۆڵی تێکەوتووە بەهۆی گەڕانەوەی دانیشتووانەکەی.

 

لەلایەکی دیکەوە؛ وەک بەشێک لە ڕێککەوتنی ئاگربەست، هەوڵەکان بۆ گەیاندنی یارمەتییە مرۆییەکان بۆ ناوچە زیانلێکەوتووەکان چڕکراونەتەوە. بەپێی زانیارییەکان، ئامادەکاری دەکرێت بۆ کردنەوەی دەروازەی کەرەم شاڵۆم بەڕووی کاروانی هاوکارییەکاندا، کە ئەمەش بە هەنگاوێکی گرنگ دادەنرێت لە قۆناغی یەکەمی ئاگربەستەکەدا بۆ سووککردنی باری سەرشانی هاوڵاتیانی مەدەنی.