پڕۆگرامی خۆراکی جیهانی: هەزاران تۆن خۆراک گەیێنرایە غەززە

ئاڤا نیوز

پڕۆگرامی خۆراکی جیهانی سەر بە نەتەوەیەکگرتووەکان چوونەژوورەوەی دەیان بارهەڵگری خۆراک بۆ غەززە ڕادەگەیێنێت.

 

وێنە گەورەکە: لە ماوەی دوو ساڵی شەڕی نێوان سوپای ئیسرائیل و بزووتنەوەی حەماس لە کەرتی غەززە، جگە لە کوژران و برینداربوونی دەیان هەزار کەس، بەهۆی گرتنی دەروازەکان بۆ نێو کەرتی غەززە، هاووڵاتیان زۆر بە ئەستەم ژەمێک خۆراکیان دەستدەکەوت بە ڕاددەیەک دەیان منداڵ و بەساڵاچوو بەهۆی بەدخۆراکییەوە گیانیان لەدەست دا.

 

ڕاگەیێنراوی فەرمی: پڕۆگرامی خۆراکی جیهانی سەر بە نەتەوەیەکگرتووەکان (WFP) ڕایگەیاند، دەستی کردووە بە فراوانکردنی ئۆپەراسیۆنەکانی لە کەرتی غەززە. تا ئێستا 137 بارهەڵگر چووەتە ناو غەززە بۆ پشتگیریکردنی نانەواخانەکان، دابینکردنی خۆراکی پێویست و دابەشکردنی خۆراک.

 

زانیاریی زیاتر: بەگوێرەی پڕۆگرامی خۆراکی جیهانی، زیاتر لە 170 هەزار تۆن ماددەی خۆراکی ئامادەیە بۆ گواستنەوە بۆ غەززە کە بەشی خواردنی 2 ملیۆن کەس دەکات.

 

لەلایەکی دیکەوە: پڕۆگرامی خۆراکی جیهانی دەڵێت: ئامانجی پڕۆگرامەکە بریتییە لە زۆرترین بڕی خۆراک بە خێرایی بگەیەنرێتە غەززە، بە مەرجێک ئاگربەستەکە بەردەوام بێت و کاریگەرییەکانی خۆی بمێنێتەوە.