مافیا بە چەکەوە هەڵدەکوتێتە سەر قوتابخانەیەک لە سوید؛ دەیان قوتابی کوردی تێدابووە

ئاڤا نیوز

لە ڕووداوێکی دڵتەزێندا کە ترس و دڵەڕاوکێی خستە ناو دانیشتوانی شاری لیندسبێرگ لە پارێزگای ئۆرێبرۆ، کە بەشێکی بەرچاوی دانیشتوانەکەی کوردن، مافیایەک بە ماسک و چەکەوە هەڵیکوتایە سەر قوتابخانەیەک. ئەم ڕووداوە بووە هۆی ئەوەی زیاتر لە سێ کاتژمێر قوتابییەکان لە ژوورەوە بمێننەوە و دەرگاکانیان لەسەر دابخرێت، کە ژمارەیان نزیکەی 300 قوتابی بوو، لەوانەش 65 قوتابی کورد.

زانیاریی زیاتر: دوای ڕووداوەکە، پۆلیس و هێزە ئەمنییەکانی سوید خرانە حاڵەتی ئامادەباشییەوە. بەپەلە هەلیکۆپتەر بەرزکرایەوە و دەیان کارمەندی ئاسایش و پۆلیس و فریاگوزاریی خێرا و بەرگری شارستانی بەوپەڕی ئامادەییەوە گەیشتنە شوێنی ڕووداوەکە. هەروەها بە پەلە پەیوەندی بە دایک و باوکی قوتابییەکانەوە کرا بۆ ئەوەی خێرا خۆیان بگەیەننە قوتابخانەکە و بەهانای منداڵەکانیانەوە بچن.

زانیاریی بەدەستهاتوو: هاووڵاتیانی کوردی نیشتەجێی لیندسبێرگ ڤیدیۆیان بۆ ئاڤا ناردووە و نیگەرانیی خۆیان دەربڕیوە لەبارەی تێکچوونی دۆخی ئەمنی لە سوید. یەکێک لەوان ڕایگەیاند: "بارودۆخی سوید باش نییە، هەر ڕۆژە و گرووپێکی مافیا، یان ئاوا ناوبەناو چەکدارێک هەڵدەکوتێتە سەر قوتابخانەکان." بەگوتەی ئەوان ئەم جۆرە حاڵەتانە لە ئێستادا لە ئەوروپا زۆر بوون.

چی ڕوویدا: خۆشبەختانە چەکدارەکە تەقەی نەکرد، بەڵام دیمەنی چەک و ماسکەکە ترس و دڵەڕاوکێیەکی زۆری لەناو قوتابییان و مامۆستایاندا دروست کردبوو. هێزەکانی پۆلیس و یەکە تایبەتەکانی ئاسایش بە خێرایی چوونە ناو قوتابخانەکە و لە دەرگای دواوەوە، گرووپ بە گرووپ قوتابییەکانیان ڕزگار کرد.

زانیاریی زیاتر: لە ئۆپەراسیۆنەکەدا سێ هەلیکۆپتەر و دەیان کارمەندی ئاسایش و پۆلیس و فریاکەوتنی خێرا و بەرگری شارستانی بەشداربوون، کە ئەمەش گەورەیی ڕووداوەکە و ئاستی مەترسییەکەی نیشان دەدات.