کاندێدێک لەکەرکووک: چۆن کۆمپانیای نەوتی باکوورم سووتاند، پەرلەمانیش دەسووتێنم

ئاڤا نیوز

لە چیرۆکێکی نوێی بانگەشەی هەڵبژاردن خانمە کاندیدێک لە کەرکووک دەڵێت:  " وەکوو چۆن کۆمپانیای نەوتی باکوورم سووتاند، پەرلەمانیش دەسووتێنم"، ئەمەش کاردانەوەیەکی زۆری لێدەکەوێتەوە.

چیرۆکی سەرەکی: گوڵسێل محەممەد عەبدولڕەحمان، کاندیدی بەرەی تورکمانیی لە کەرکووک، لە دەسپێکی کەمپەینی بانگەشەیدا، بە گڕوتینێکی زۆرەوە دەڵێت: "من کارمەندبووم لە کۆمپانیای نەوتی باکوور،  بە تەنیا خۆم  هەموو کۆمپانیاکەم سووتاند و گڕم تێبەردا، کەواتە دەنگم پێبدەن، باسەرکەوم  وەک چۆن کۆمپانیای نەوتی باکوورم سووتاند، پەرلەمانیشتان بۆ دەسووتێنم ".

كاریگه‌ریی و لێكه‌وته‌كان:  لێدوانە ئاگرینەکەی خاتوو گوڵسێل، هەر زوو لەتۆڕە کۆمەڵایەتیەکان لەلایەن هاووڵاتییان و چالاکوانانەوە ڕەخنەباران کرا و زۆربەشیان پرسیاری ئەوە لەو خاتوونە دەکەن: "ئایە چ پەیوەندییەک لە نێوان دەرکردنی یاسا و چاودێریکردنی ئیشوکاری حکومەت و سووتاندنی پەرلەماندا هەیە؟، خۆ ئەگەر پەرلەمان بسوتێنێت، ئەو 329 پەرلەمانتارە بەجەنابیشتانەوە لە کوێ بۆ دانیشتنەکان کۆببنەوە؟.

له‌لایه‌كی دیكه‌وه: دوای ئەو ڕەخنانە گوڵسێل بەمیدیای حیزبەکەی گوت: " کاتێک ئەو خەڵکە زۆرەم بینی حەماس گرتمی و دەفع بووم ئەو قسەیەم کرد، مەبەستم پەرلەمان سووتاندن نەبووە و تەنیا ویستوومە پەیامەکەم بگەیەنم، بەڵام زۆری پێنەچوو ئەو خانمە کاندیدە بابەتی سووتاندنەکەی گەیاندە ئاستێکی باڵاتر و وتی: "ئەمڕۆ دووبارەی دەکەمەوە و بە ڕاشکاوی دەڵێم: هەموو وەزارەتەکانیش دەسووتێنم ".