بلومبێرگ: تورکیا یارمەتی سەربازی سووریا دەدات بۆ هێرشکردنە سەر هەسەدە

 ئاڤا نیوز 

بەپێی زانیارییەکانی پێگەی بلومبێرگ، تورکیا خۆی ئامادە دەکات بۆ گەیاندنی کەلوپەلی سەربازی بە سووریا لە چوارچێوەی ڕێککەوتنێکی ئەمنی لەگەڵ ئەو وڵاتە، کە دەسەڵاتی ئەنقەرە بۆ لێدان لە هێزەکانی سووریای دیموکرات فراوان دەکات.

زانیاریی بەدەستهاتوو: بەرپرسانی تورکیا کە نەیانویستووە ناوەکانیان ئاشکرابکرێت بە پێگەی بلومبێرگیان ڕاگەیاندووە، چاوەڕوان دەکرێت یارمەتییە سەربازییەکان لە چەند هەفتەی داهاتوودا بگاتە سووریا کە بریتین لە زرێپۆش، فڕۆکەی بێفڕۆکەوان، تۆپهاوێژ، مووشەک و سیستەمی بەرگریی ئاسمانی.

زانیاریی زیاتر: ئەم کەلوپەلە سەربازییانە بە شێوەیەکی سەرەکی لە باکووری سووریا جێگیر دەکرێن و لە ناوچەکانی سنووری ئیسرائیل دوور دەخرێنەوە.

ئەوەی پێویستە بیزانیت: پێگەکە ئەوەشی ئاشکراکردووە، ئامانجی ئەم پاڵپشتییە سەربازییە بەهێزکردنی دەسەڵاتی ئەحمەد شەرع، سەرۆکی سووریایە کە هەوڵی چەسپاندنی دەسەڵاتی خۆی لە سەرانسەری سووریا و بوونیادنانەوەی هێزە چەکدارەکانی وڵاتەکەی دەدات.

ئەمەش بزانە: تورکیا و سووریا لە گفتوگۆدان بۆ نوێکردنەوەی ڕێککەوتنی ئەمنی لەسەر سنوورەکانیان کە ڕێگە بە هێزەکانی تورکیا دەدات لە چەکدارانی نزیک سنوورەکانی بدەن. بەگوێرەی ڕاپۆرتەکان، ئەنقەرە دەیەوێت مەودای ڕێگەپێدراوی ئۆپەراسیۆنەکانی لە پێنج کیلۆمەتر بۆ 30 کیلۆمەتر فراوان بکات.