هۆشداری دەدرێت؛ لە ئێران 750 شار مەترسیی ڕۆچوونیان لەسەرە

ئاڤا نیوز

 

بەرپرسی بەشی بومەلەرزەزانی سەنتەری توێژینەوەی ئێران دەڵێت، بەهۆی وشکەساڵی و کەمبارانی لە وڵات 750 شار مەترسیی گەورەی ڕۆچوونیان لەسەرە. 

 

وێنە گەورەکە: بەهۆی ئەو وشکە ساڵی و کەم بارانییەی ئێران، ڕۆچوونی بەرچاوی زەوی لە شارەکانی ئێران دەبینرێت و بەرپرسان دەڵێن، ئەم ڕۆچوونە زۆرە زەنگێکی زۆر مەترسیدارە و هەڕەشەی جددی لە دانیشتوان دەکات.

 

لێدوانی فەرمی: عەلی بەیتوڵڵاهی، بەرپرسی بەشی بومەلەرزەزانی سەنتەری توێژینەوەی ڕێگاوبان و نیشتەجێکردن و گەشەپێدانی شارەکانی ئێران ڕایگەیاند: 750 شاری ئێران مەترسی ڕۆچوونیان لەسەرە. دەشڵێت، "ڕووپێوییەکان دەریدەخەن کە نزیکەی 63 شوێنەواری مێژوویی تۆمارکراوی نیشتمانی و 27 شوێنەوار کە گرنگییەکی جیهانییان هەیە کەتوونەتە ئەو ناوچانەی مەترسی ڕۆچوونیان هەیە.

 

بەگوتەی بەیتوڵڵاهی زیاتر لە 10 هەزار شوێنی نیشتەجێبوون کە دەکەونە ناوچەی پیشەسازی و تۆڕی گواستنەوەی بۆری نەوت مەترسییەکە زیاترە.

 

بە تەنیشت ئەم بابەتەوە؛ عەلی بەیتوڵڵاهی ئەوەشی ڕایانگەیاند: بەهۆی ئەو ئامارە زۆرەی هەڵکەندنی بیر لە هەموو شارەکانی ئێران کە زیاتر لە یەک ملیۆن بیر هەڵکەندراوە، ئێران بە یەکێک لەو وڵاتانە دادەنرێت کە ئاوی ژێرزەوی بەرەو وشکبوونی تەواوەتی دەڕوات و هۆکاری سەرەکی ڕۆچوونی زەویش کە مەترسی گەورەیە لەسەر ئێران بۆ هەڵکەندنی بیر و کەمبارانیی دەگەڕێتەوە.