هەولێر سوود لە ئەزموونی دیجیتاڵیی ئەبوزەبی وەردەگرێت

ئاڤا نیوز

دیداری ئاڵوگۆڕی ئەزموون لە نێوان هەرێمی كوردستان و وڵاتی ئیمارات ڕێکدەخرێت و پلاتفۆرمێک بە فەرمی ڕادەگەیەنرێت.

 

چیرۆکی سەرەکی: شاندێکی باڵای وڵاتی ئیمارات گەیشتووەتە هەولێر و دیدارێکی تایبەت لە نێوان حکومەتی هەرێمی کوردستان و وڵاتەکە بەڕێوەدەچێت، کە دوو پانێڵ و کۆبوونەوەی نۆ تیمی جیاواز لەخۆدەگرێت، تێیدا چەند پێشنیازێک ئاڵوگۆڕ دەکرێن و دەستپێشخەرییەکی نوێش ڕادەگەیێنرێت.

زانیاریی زیاتر: دیدارەکە کاریگەری لەسەر پێشخستنی تواناکانی حکومەتی هەرێمی کوردستان هەیە لەبواری بەدیجتاڵیکردنی کاروبارەکان، چونکە ئیمارات ئەزموونێکی درێژخایەن و سەرکەتووی لە بوارەکەدا هەیە.

ئەوەی پێویستە بیزانیت: لەم چوارچێوەیەدا پلاتفۆرمێک بۆ هەڵسەنگاندنی ئەدای حکومەتی هەرێمی کوردستان ڕادەگەیێنرێت کە بە هەماهەنگی لەگەڵ حکومەتی ئیمارات دروست کراوە، بۆ پێشخستنی کارەکانی حکومەت و دامەزراوەکانی کار دەکات. 

ئەمەش بزانە: هەردوولا یاداشتێکی لێکتێگەیشتنیان واژۆ کردووە، حکومەتی هەرێمی کوردستان بۆ کەمکردنەوەی ڕۆتین و بەڕێکردنی مامەڵەی هاونیشتمانیان بەشێوەیەکی خێراتر سوود لە ئەزموونی ئیمارات وەردەگرێت.