ئەمساڵ زیاتر لە 149 هەزار ئۆتۆمبێل هێنراوەتە هەرێمی کوردستان

ئاڤا نیوز

لە 10 مانگی رابردوودا زیاتر لە 149 هەزار ئۆتۆمبێل لە جۆری جیاواز هێنراونەتە هەرێمی کوردستان و بەشێکیان ڕەوانەی عێراق کراون.

وێنە گەورەکە: بەهۆی کەمیی جۆری هۆکارەکانی گواستنەوەی وەک میترۆ و شەمەندەفەر، هاونیشتمانیانی هەرێمی کوردستان و عێراق بۆ هاتووچۆکردن بەشێوەیەکی سەرەکی پشت بە ئۆتۆمبێل دەبەستن، بەمەش خواستی زۆر و بەردەوام لەسەر کڕینی ئۆتۆمبێل هەیە و ڕۆژانە دەیان جۆری جیاوازی ئۆتۆمبێل دەهێنرێنە کوردستان.

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانیی هەرێمی کوردستان بە ئاڤای وت: لە 10 مانگی ڕابردوو 734 مۆڵەتمان بە کۆمپانیا و بازرگانان داوە، 149 هەزار و 592 ئۆتۆمبێل لەڕێگەی دەروازە سنوورییەکانەوە هاوردەی هەرێمی کوردستان کراون، بەراورد بە 10 مانگی ساڵی ڕابردوو، بەڕیژەیەکی بەرچاو زیادی کردووە.

زانیاریی زیاتر: ئۆتۆمبێلەکان لە خەسڵەتی بەنزین، هایبرێد و کارەبایی پێکهاتوون، لە وڵاتەکانی ئەمریکا، یابان، ئەڵمانیا، چین و چەند وڵاتێکی دیکەوە هاوردە دەکرێن، بەشێکیشیان ڕەوانەی عێراق دەکرێن.