باڵیۆزی تورکیا لە عێراق بۆ مەسرور بارزانی: پیرۆزبایی سەرکەوتنی پڕۆژەکانت لێ دەکەم

ئاڤا نیوز

باڵیۆزی تورکیا لە عێراق پیرۆزبایی سەرکەوتنی پڕۆژە و چاکسازییەکانی حکومەتی هەرێمی کوردستانی لە مەسرور بارزانی، سەرۆکوەزیران کوردستان دەکات.

 
چیرۆکی سەرەکی: ئه‌مڕۆ سێشەممە 21-10-2025، مەسرور بارزانى، سه‌رۆكوەزیرانی كوردستان، پێشوازی لە ‌ئانڵ بۆرا ئينان، باڵيۆزى توركيا له‌ عێراق کرد. لە کۆبوونەوەکەدا ئەرمان تۆپچو، کونسوڵی گشتیی تورکیا لە هەرێمی کوردستان ئامادەی بوو، وێڕای جەختکردنەوە لە پەرەپێدانی پەیوەندیی دوولایەنە، دوایین پێشهات و پەرەسەندنەکانی دۆخی گشتیی عێراق، ئامادەکارییەکانی هەڵبژاردنی ئەنجوومەنی نوێنەران تاوتوێ کران.

ڕاگەیێنراوی فەرمی: ماڵپەڕی حکومەتی هەرێمی کوردستان بڵاویکردەوە: باڵيۆزى توركيا پیرۆزبایی سەرکەوتنی پڕۆژە و چاکسازییەکانی حکومەتی هەرێمی کوردستانی لە کەرتە جۆراوجۆرەکاندا لە سەرۆکی حکومەت کرد، بەتایبەتیش ئاماژەی بە پڕۆژەی ڕووناکی، پڕۆژەکانی پاراستنی ژینگە، پشتێنەی سەوزایی، دابینکردن و گەیاندنی خزمەتگوزاریی ئاو کرد.

لەلایەکی دیکەوە: لە بەشێکی دیکەی گفتوگۆکاندا باس لە ڕێککەوتنی سێ لایەنەی هەناردەکردنەوەی نەوتی هەرێمی کوردستان لە ڕێگەی بەندەری جەیهانی تورکیا کرا، هەردوولا هاوڕابوون لەسەر ئەوەی پێویستە ببێتە ڕێگەخۆشکەر بۆ دەرچوونی یاسای نەوت و گاز لە خولی داهاتووی ئەنجومەنی نوێنەرانی عێراقدا.