گەشتەکەی ئەردۆغان بۆ کەنداو دەستیپێکرد و بەرەو کوێت بەڕێکەوتووە

ئاڤا نیوز

بەمەبەستی تاوتوێکردنی پرۆسەی ئاگربەستی نێوان حەماس و ئیسرائیل و گەیاندنی هاوکاریی مرۆیی بە کەرتی غەززە، گەشتەکەی سەرۆککۆماری تورکیا بۆ سێ وڵاتی کەنداو دەستیپێکرد و بەرەو کوێت بەڕێکەوتووە.

بڵاوکراوەی فەرمی: ئاژانسی هەواڵی ئانادۆڵ بڵاویکردووەتەوە گەشتەکەی ڕەجەب تەیب ئەردۆغان، سەرۆککۆماری تورکیا و شاندی یاوەری سێ ڕۆژ دەخایەنێت. کوێت یەکەم وێستگەی گەشتەکەی ئەردۆغان دەبێت و پاشان سەردانی قەتەر و دواتریش سەردانی عومان دەکات.

بە تەنیشت ئەم بابەتەوە: لە میانی دیدار و کۆبوونەوەکان هەروەها تاوتوێی پتەوکردنی پەیوەندییەکان، پێشهاتەکانی ناوچەکە، بەرەوپێشبردنی هاوکاری و هەماهەنگییەکانی نێوان تورکیا و وڵاتانی کەنداو دەکرێت لە بوارەکانی پیشەسازیی بەرگری، وزە، بازرگانی و وەبەرهێنان. 

پێویستە ئەمەش بزانیت: چاوەڕێ دەکرێت لە میانی گەشتەکەدا ئەردۆغان لەگەڵ شێخ مەشعەل ئەحمەد جابر ئەلسوباح، میری کوێت؛ تەمیم بن حەمەد ئەلسانی، میری قەتەر و هەیسەم بن تاریق تەیمور، سوڵتانی عومان کۆببێتەوە.