مەسرور بارزانی: سەرۆک بارزانی داوای لێکردووین خزمەتی زیاتری ئامێدی بکەین

ئاڤا نیوز

مەسرور بارزانی، سەرۆکوەزیرانی کوردستان نەخۆشخانەیەکی 100 قەرەوێڵەیی لە سنووری ئامێدی کرەوە و ڕایگەیاند: بە بڕیاری سەرۆک بارزانی، پێویست بوو خزمەتی زیاتری خەڵکی ناوچەکە بکەین.

چیرۆکی سەرەکی: سەرۆکوەزیرن مەسرور بارزانی، نەخۆشخانەی 100 قەرەوێڵەیی شۆرش – هێتیت لە کۆمەڵگای هێتیت لە ناحیەی دێرەلووکی قەزای ئامێدی کردەوە، نەخۆشخانەکە بە گوژمەی 43 ملیۆن دۆلار و بە ستانداردی جیهانی دروستکراوە.

لێدوانی فەرمی: مەسرور بارزانی، سەرۆکوەزیرانی کوردستان لە مەراسیمی کردنەوەی نەخۆشخانەکە ڕایگەیاند: پیرۆزبایی لە خەڵکی ناوچەکە دەکەم بۆ دروستکردنی ئەم نەخۆشخانە پێشکەوتووە، دەستخۆشی لە کۆمپانیای جێبەجێکار دەکەم  کە بە ئاستیکی زۆر باش دروستیکردوە. بە بڕیاری سەرۆک بارزانی پێویست بوو خزمەتی زیاتری دەڤەرەکە بکەین، داواکاری خەڵکی ناوچەکە بوو نەخۆشخانەیەکی لەم شێوەیە دروست بکرێت، بە تایبەت لە وەرزی زستان نەخۆشەکان نەدەگەیشتنە دهۆک و هەولێر و ئامێدی، بۆیە بڕیاری دروستکردنی نەخۆشخانەکەمان داوە. 

زانیاریی زیاتر: بە گوتەی سەرۆکوەزیران مەسرور بارزانی: نەخۆشخانەکە بە شێوازێکی سەردەمیانە دروستکراوە و ئامێری زۆر پێشکەوتووی تێدایە، سەردانی بەشەکانی نەخۆشخانەکەم کردووە، لێرە دکتۆر و پەرستاری زۆر باشمان هەیە و چیتر خەڵکی دەڤەرەکە نەخۆشەکانیان نابەن بۆ شارەکانی دیکە.