وەزیری دەرەوەی ئەمریکا بەرەو ئیسرائیل بەڕێدەکەوێت

ئاڤا نیوز

بە مەبەستی هەنگاونان بۆ قۆناغی دووەمی ئاگربەستی غەززە، ئەمریکا بەردەوامە لە ناردنی دیپلۆماتە باڵاکانی بۆ ئیسرائیل، لە چوارچێوەی ئەمەدا بڕیارە سبەی مارکۆ ڕۆبیۆ، وەزیری دەرەوەی ئەمریکا بگاتە ئیسرائیل.

چیڕۆکی سەرەکی: نیگەرانییەکانی واشنتن ڕوو لە زیادبوون دەکات، لە ئەگەری پێشلکردنی ڕێککەوتنی ئاگربەست غەززە لەلایەن ئیسرائیلەوە، بۆ ئەم مەبەستە نێردراوانی ترەمپ، جارێد کوشنەر و ستیڤ ویتکۆف، ڕۆژی دووشەممە گەیشتوونەتە ئیسرائیل و لەگەڵ بنیامین نەتانیاهۆ، سەرۆکوەزیرانی وڵاتەکە کۆبوونەتەوە، ئەمڕۆش بڕیارە جەی دی ڤانسی جێگری ترەمپ لەگەڵ نەتانیاهۆ کۆببێتەوە.

زانیاریی بەدەستهاتوو: بەرپرسێکی ئەمریکی بە ڕۆژنامەی تایمزی ئیسرائیلی ڕاگەیاندووە،'' سبەی مارکۆ ڕۆبیۆ، وەزیری دەرەوەی ئەمریکا بە سەردانێکی دوو ڕۆژە دەگاتە ئیسرائیل، دەشڵێت، گەشتەکە درەنگانی ئەمڕۆ بە فەرمی ڕادەگەیەنرێت''.

بۆچی گرنگە: ئامانج لەم سەردانەی ئەم وەفدە باڵایەی ئەمریکا پێشخستنی ڕێککەوتنە و کارکردنە لەسەر قۆناغەکانی داهاتووی ئاگربەستی غەززە، لە ژێر پلانی 20 خاڵی ئاشتیی ترەمپ.

ئەمەش بزانە: ئەمە چوارەم سەردانی ڕۆبیۆ دەبێت بۆ ئیسرائیل لە دوای دەستبەکاربوونی لە مانگی یەکی ئەمساڵدا.