سوپای ئیسرائیل کوشتنی بەرپرسێکی حیزبوڵڵا لە باشووری لوبنان ڕادەگەیەنێت

ئاڤا نیوز

سوپای ئیسرائیل ڕایگەیاند، بەرپرسێکی "هێزی ڕەزوان"ی سەر بە حیزبوڵڵای لە هێرشێکی ئاسمانیدا لە ناوچەی عەین قانا لە باشووری لوبنان کوشتووە.

وێنە گەورەکە: لەدوای ڕێککەوتنی ئاگربەست لە مانگی 11ـی ساڵی ڕابردووەوە، سوپای ئیسرائیل دەستی لە هێرشکردنە سەر ئامانجەکانی حیزبوڵڵا و کادیرەکانی هەڵنەگرتووە و لە هێرشەکانی بۆ سەر باشووری لوبنان بەردەوامە.

بڵاوکراوەی فەرمی: کاپتن ئێلا، سەرۆکی بەشی ڕاگەیاندنی عەرەبی لە سوپای ئیسرائیل، لە هەژماری خۆی لە "ئێکس" نووسیویەتی: "هێزی ئاسمانی ئیسرائیل لە هێرشێکدا لە ناوچەی عەین قانا لە باشووری لوبنان توانیان عیسا ئەحمەد کەربەلا، فەرماندە لە هێزی ڕەزوان بکەنە ئامانج".

زانیاریی زیاتر: بەگوتەی ئێلا، "کەربەلا دەستی هەبووە لە گواستنەوەی چەک لەناو لوبناندا، چالاکییەکانیشی ببووە مایەی پێشێلکردنی لێکگەیشتنەکانی نێوان ئیسرائیل و لوبنان".

ئەوەی لەبارەیەوە دەگوترێت: پێشتر، تۆم باراک، نێردەی ئەمریکا بۆ سوریا، هۆشداری دابوو لە ڕوودانی پێکدادانێکی گەورە لە نێوان حیزبوڵڵا و ئیسرائیل ئەگەر دۆخی ئێستا بەردەوام بێت و دەوڵەتی لوبنان کۆنترۆڵی خۆی نەسەپێنێت و چەکی حیزبوڵڵا لە باشووری لوبنان کۆنەکاتەوە.

باکگراوند: ململانێی نێوان حیزبوڵڵا و ئیسرائیل لە تشرینی یەکەمی 2023 دەستی پێکرد، کاتێک گرووپەکە وەک هاوسۆزییەک لەگەڵ بزووتنەوەی "حەماس" لە سەرەتای جەنگی غەززەدا، هێرشی کردە سەر بنکەکانی ئیسرائیل بە درێژایی سنووری باشوور.