ئەمریکا: جگە لە پلانی 20 خاڵی ترەمپ هیچ پلانێکی دیکە بۆ غەززە نییە

ئاڤا نیوز

لە میانەی سەردانەکەی مارکۆ ڕوبیۆ، وەزیری دەرەوەی ئەمریکا بۆ ئیسرائیل، دووپاتیکردەوە، جگە لە پلانی ترەمپ هیچ بەرنامەیەکی دیکە نییە و لایەنەکان لەسەر ئەو پلانە هەنگاو دەنێن.

وێنە گەورەکە: مارکۆ ڕوبیۆ، وەزیری دەرەوەی ئەمریکا، دوایین بەرپرسی باڵای ئەمریکا بوو سەردانی ئیسرائیلـی کرد بە مەبەستی چاودێری جێبەجێکردنی هەنگاوەکانی ڕێککەوتنی ئاگربەستی غەززە سەردانەکەشی دوای زنجیرەیەک نێردروای ئاستی باڵا بۆ ئیسرائیل هات لە نێویاندا ستیڤ ویتکۆف و جارێد کوشنەر کە دووشەممەی ڕابردوو گەیشتنە ئیسرائیل و دواتریش جەی دی ڤانس ڕۆژی سێشەممە و ڕۆبیۆ کۆتا بەرپرسی باڵای ئەمریکا بوو گەیشتە ئیسرائیل.

لێدوانی فەرمی: مارکۆ ڕوبیۆ، وەزیری دەرەوەی ئەمریکا ڕایگەیاند، پلانی بی 'B'  بۆ غەززە نییە، تەنیا پلانی ئاشتی 20 خاڵی دۆناڵد ترەمپ سەرۆکی ئەمریکا هەیە هەر ئەو پلانە سەرکەوتوو بووە، جەخت لەوە دەکاتەوە، حەماس "ناتوانێت لە داهاتوودا بەشداری لە بەڕێوەبردنی غەززەدا بکات"، ئەمەش لەلایەن هەموو ئەو وڵاتانەوە ڕێککەوتنی لەسەر کراوە و واژۆیان لەسەر پلانەکەی ترەمپ کردووە، دەشڵێت چی دیکە نابێت حەماس ببێتە سەرچاوەی هەڕەشەکردن بۆ ئیسرائیل ''.

زانیاریی زیاتر: سەبارەت بە قۆناغی دووەمی ئاگربەست ڕۆبیو وتی، بۆ ئەوەی بگەنە قۆناغەکانی داهاتووی پلانەکەی ترەمپ، پێویستە سەرنج لەسەر دەستەبەرکردنی سەرکەوتنی قۆناغی سەرەتایی ئاگربەستەکە بێت.

ئەوەی لەبارەیەوە دەگوترێت: بەرپرسانی ئەمریکی دڵنیاییان دەربڕیووە کە ئاگربەستەکە بەردەوام دەبێت – سەرەڕای هەندێک لە پێشلکارییەکان.