پەکەکە هەنگاوێکی دیکە بۆ سەرخستنی پرۆسەی ئاشتیی دەنێت

ئاڤا نیوز 

بەبێ چوونە ناو وردەکاری و ئاماژەدان بەوەی هەنگاوەکە چی دەبێت میدیاکانی نزیک لە پەکەکە بڵاویان کردووەتەوە، بڕیارە وەک بەدەمەوەهاتن بۆ پەیامەکەی عەبدوڵڵا ئۆجەلان و پابەندبوون بە بڕیارەکانی کۆنگرەی 12ی پەکەکە، سبەی گەریلاکانی پەکەکە هەنگاوێکی دیکەی "مێژوویی"  بنێن.


وێنە گەورەکە: 27-2-2025 عەبدوڵڵا ئۆجەلان وەک بە دەمەوەهاتن بۆ دەستپێشخەرییەکەی دەوڵەت باخچەلی، سەرۆکی گشتیی مەهەپە داوای لە پەکەکە کرد بۆ خۆهەڵوەشاندنەوە و چەکدانان، کۆنگرە ببەستێت و ڕەخساندنی زەمینەسازیی یاساییشی بۆ پرۆسەکە لە لایەن تورکیاوە بە پێویست زانی. پەکەکەش لە 5 بۆ 7ی ئایار کۆنگرەی 12ی بەست و پابەندبوونی خۆی بە داواکارییەکەی ئۆجەلان ڕاگەیاند.

بڵاوکراوەی فەرمی: میدیاكانی نزیك لە پەكەكە بە پشتبەستن بە سەرچاوەی متمانەپێکراو بڵاویان کردووەتەوە، ئەم هەنگاوە مێژووییەی گەریلاکان بۆ سەرخستنی پرۆسەی ئاشتی و کۆمەڵگەی دیموکراتییە و بڕیارە لە کۆنگرەیەکی ڕۆژنامەوانیدا ڕای گشتی لەو هەنگاوە ئاگادار بکەنەوە. 

ئەوەی پێویستە بیزانیت: وەک نیشاندانی نیازپاکی لە 11-7-2025 گرووپێک لە گەریلاکانی پەکەکە بە شێوەی سیمبوولی لە ئەشکەوتی جاسەنە چەکەکانیان سووتاند. دوای ئەو ڕێوڕەسمە و لە 1-8-2025 بۆ ڕەخساندنی زەمینەسازیی یاسایی بۆ پرۆسەکە و لەسەر داوای ئۆجەلان و باخچەلی کۆمیسیۆنێک لە پەرلەمانی تورکیا پێک هێندرا. 

لە لایەکی دیکەوە: ئەم هەنگاوە نوێیەی پەکەکە لە کاتێکدا دێت لە سەرەتای ئەم مانگەوە وەرزی نوێی یاسادانان لە پەرلەمانی تورکیا کراوەتەوە و بڕیارە 28ی مانگ شاندی ئیمڕاڵی لەگەڵ ڕەجەب تەیب ئەردۆغان، سەرۆککۆماری تورکیا کۆببێتەوە.