محەممەد شوكری: تا كۆتایی ئەمساڵ ژمارەی مۆڵەتی پرۆژەكان دەگەیەنینە 200 پرۆژە

ئاڤا نیوز

 

سەرۆكی دەستەی گشتیی وەبەرهێنانی كوردستان ڕایدەگەیێنێت، ئەمساڵ زۆرترین مۆڵەتمان بە پرۆژەكانی وەبەرهێنان داوە، پلانەكە ئەوەیە تا كۆتایی ئەمساڵ ژمارەی مۆڵەتەكان بگەیەنینە 200 پرۆژە.

 

وێنە گەورەكە: بەفەرمانی سەرۆكوەزیران مەسرور بارزانی، لەماوەی كابینەی نۆیەمی حكومەتی هەرێمی كوردستان، ژمارەیەك ڕێنمایی بۆ كارئاسانیی وەبەرهێنان دەرچوون، ئەوەش وای كردووە وەبەرهێنەران لە جاران دەستكراوەتر بن بۆ جێبەجێكردنی پرۆژەكان لە سەرجەم سێكتەرەكاندا.

 

لێدوانی فەرمی: د. محەممەد شوكری، سەرۆكی دەستەی گشتیی وەبەرهێنانی كوردستان میوانی ئاڤا بوو، وەڵامی ژمارەیەك پرسیاری پەیوەست بە بواری وەبەرهێنان دایەوە و دووپاتی كردەوە، ئەمساڵ سەرنجمان لەسەر ئەوە بوو زۆرترین مۆڵەت بە پرۆژەكانی وەبەرهێنان بدەین و پلانەكە ئەوەیە تا كۆتایی ئەمساڵ ژمارەكە بگاتە 200 مۆڵەت.

 

زانیاریی زیاتر: سەرۆكی دەستەی وەبەرهێنان ڕوونیشی كردەوە، بەپێی دابەشبوونی شوێنە جوگرافییەكان مۆڵەت بە پرۆژەكانی وەبەرهێنان دەدەین و ئێستا سەرنجمان زیاتر خستووەتە سەر جێبەجێكردنی پرۆژەكان لە شارۆچكە و ئیدارە سەربەخۆكان. لە شارە گەورەكان زیاتر مۆڵەت بە پرۆژە پیشەسازییەكان و كارسازییەكان دەدەین بەجێگەی پرۆژەكانی نیشتەجێبوون.

 

ئەوەی پێویستە بیزانیت: هەر پرۆژەیەك لەگەڵ پلانی وەبەرهێنان و ماستەرپلانی شار و شارۆچكەكان نەگونجێت، مۆڵەتی پێنادرێت، یاخود پرۆژە لە سێكتەرێكی دیاریكراو زۆربێت، بەهەمان شێوە مۆڵەتی پێ نادرێت، یاخود سەرمایەی پرۆژەكە سنووردارە و لەئاست جێبەجێكردنی پرۆژەكەدا نییە، بەهەمان شێوە مۆڵەتی پێ نادرێت و هانی وەبەرهێنەرەكە دەدرێت پڕۆژەكانی بباتە دەرەوەی شارە گەورەكان كە سەرمایەكی كەمتری پێویستە.