بڵاوبوونەوەی بۆنی گۆگرد دانیشتووانی بەغدای هەراسان کردووە

ئاڤا نیوز

لە ئێوارەی ڕۆژی هەینییەوە بۆنێکی سوتێنەری گۆگردی بەغدای پایتەختی گرتووەتەوە و بەشێک لە هاووڵاتییانی ناوچەکەی تووشی تەنگەنەفەسی و سووتانەوەی چاو کردووە. 

چیرۆکی سەرەکی: ئەو بۆنە قورس و ناخۆشە لە ناوچەی کەرخ و ڕەسافە بڵاوبووەتەوە و تا دەورووبەری پایتەختیشی گرتووەتەوە، میدیا عێراقییەکانیش باس لەوە دەکەن هاووڵاتییان هەستیان بە تەنگەنەفەسی و سووتانەوەی چاوەکانیان کردووە.

زانیاریی بەدەستهاتوو: دانیشتووانی ئەو ناوچانەی کە بۆنەکە بەشێوەیەکی فراوان تێیاندا بڵاوبووەتەوە ئاماژەیان بەوەکردووە، لە سەرەتای ئێوارەوە بە تووندی بڵاوبووەتەوە و تا وەکوو ئێستاش لەهەندێک شوێن بەردەوامە، بەوهۆیە ناچاربوون پەنجەرەی ماڵەکانیان دابخەن بۆ کەمکردنەوەی کاریگەرییەکەی.

باكگراوند: پێشتر چەند پسپۆڕێکی بواری ژینگە بە ئاڤایان ڕاگەیاند، دووبارەبوونەوەی ئەم دیاردەیە لەبەغدا و ناوچەکانی دەوروبەری، بەهۆی دەردانی گازی کارگەکانی بلۆکەوەیە، کە سوتەمەنی قورس (نەوتی ڕەش) بەکاردەهێنن و کارگەکانی کبریتیش لەدەوروبەری بەغدا ڕۆڵی خراپی هەیە بەسەر ژینگەی ناوچەکە.  

لەلایەکی دیکەوە: سەنتەری چاودێری "عێراقی سەوز" کە تایبەتە بە کاروباری ژینگە، هۆشداری دا کە هەوای بەغدا پڕ بووە لە ماددەی مەترسیدار کە هەڕەشە لە تەندروستی منداڵان و بەساڵاچووان دەکات، هەروەها بۆ یەکەمجارە ڕێژەی پیسبوونی هەوای بەغدا 515% تۆمار بکات.