پزیشکیان: پێشوازی لە شەڕ ناکەین بەڵام وەڵامی دەستدرێژی دەدەینەوە

ئاڤا نیوز

سەرۆککۆماری ئێران ڕایگەیاند، بەهیچ شێوەیەک پیشوازی لە شەڕ ناکەین، بەڵام ئامدەی وەڵامدانەوەی هەموو دەستدرێژییەکین.

چیرۆکی سەرەکی: ئەمڕۆ هەینی، مەسعوود پزیشکیان، سەرۆککۆماری ئێران و شێخ محەممەد بن زاید ئال نەهیان، سەرۆکی دەوڵەتی ئیمارات، لە پەیوەندییەکی تەلەفۆنیدا دوایین پێشهاتەکانی ناوچەکەیان تاوتوێ کرد.

لێدوانی فەرمی: سەرۆککۆماری ئێران ڕایگەیاند، بەهێزکردنی پەیوەندییەکان لەگەڵ وڵاتانی ئیسلامی و دراوسێ ئەولەویەتی ستراتیژی تارانە و جەختی لە دیپلۆماسییەکی شکۆمەندانە کردەوە. ئاماژەی بەوەشکرد، ئێران بە هیچ شێوەیەک پێشوازی لە جەنگ ناکات و بە بەرژەوەندی هیچ لایەنێکی نازانێت، بەڵام ڕەخنەی لە وڵاتانی ڕۆژئاوا گرت کە پابەندی پرەنسیپە نێودەوڵەتییەکان نین و هۆشداری دا هەر دەستدرێژییەک بۆ سەر خاک و گەلی ئێران، بێ وەڵام نابێت و بە تووندی بەرپەرچی دەدرێتەوە.

بۆچوونی لایەنی بەرامبەر: شێخ محەممەد بن زاید ئال نەهیان، سەرۆکی ئیمارات ئامادەیی وڵاتەکەی دەربڕی بۆ هەر جۆرە هاوکاری و بەشدارییەک لە پڕۆسە دیپلۆماسییەکاندا بە مەبەستی چەسپاندنی ئاسایش و سەقامگیری لە ناوچەکەدا.